გორში პოლიციის აღლუმთან დაკაშირებით, შსს-ს ყველა დანაყოფმა გენერალური რეპეტიცია გაიარა. როგორც „ინტერნეტ.ჯი“-ს შსს-ს ანალიტიკური დეპარტამენტის უფროსმა შოთა უტიაშვილმა განუცხადა, აღლუმს საქართველოს პრეზიდენტ მიხეილ სააკაშვილთან ერთად, შინაგან საქმეთა მინისტრი ვანო მერაბიშვილი დაესწრება.

„გორის ცენტრში, აღლუმის გენერალური რეპეტიცია გვიან ღამით დასრულდა. აღლუმში სამინისტროს ყველა დანაყოფი მიიღებს მონაწილეობას“,- განაცხადა უტიაშვილმა.

ამასთან, როგორც „ინტერნეტ.ჯი“-ს გორიდან აცნობეს, დღეს დილით, ქალაქის ცენტრში პოლიციის შენობის ფორმის კონსტრუქცია დაიდგა.

6 მაისი საქართველოში პოლიციის დღეა.  ამ დღის აღსანიშნავად საზეიმო აღლუმი ამჯერად, დედაქალაქის ნაცვლად, გორში გაიმართება. პოლიციის აღლუმს საქართველოს ხელისუფლების პირველი პირები ჩაიბარებენ.

საქართველოში,  6 მაისი პოლიციის დღედ 2010 წლიდან აღინიშნება, ამ დღისადმი მიძღვნილი პირველი ღონისძიება თბილიში გაიმართა, 2011 წელს აღლუმს ბათუმმა უმასპინძლა.

ცნობისთვის, 6 მაისი აჭარის რევოლუციის დღეცაა.

Internet.ge