მმართველი გუნდის წევრის, შოთა მალაშხიას შეფასებით, გასაკვირი არ არის, რომ რეფორმების მსხვერპლს – „გაიშნიკ“ გია ცაგარეიშვილს ახლანდელი პერიოდი უკვირს.

როგორც დღევანდელ პლენარულ სხდომაზე, მალაშხიამ განაცხადა, საზოგადოება კარგად ხედავს, რომ მათ საქართველოში საბჭოთა კავშირის ქურდულ–კრიმინალური მენტალიტეტის რესტავრაცია უნდათ.

„მაგრამ, ეს მატარებელი წავიდა. ამის შანსი აღარავის აქვს, არც თქვენი „ოცნების“ ხელმძღვანელებს – პუტინსა და მედვედევს.  მთლიანად „ქართული ოცნების“ წევრთა აზრიც უკან საბჭოთა კავშირში დაბრუნებაა. მათ სურთ, რომ ოკუპირებული ტერიტორიების ეთნოწმენდა დაკანონდეს, იმიტომ, რომ მათ კრემლიდან სხვა დავალება არ მიუღიათ. ეს არის სტრუქტურა (კოალიცია), რომელიც ყოველდღიურად გვეუბნება, რომ ომი ჩვენ დავიწყეთ, ეთნოწმენდაში ჩვენ ვართ დამნაშავე, ხოლო მისი ერთ–ერთი ლიდერი გამოდის და საუბრობს, რომ ჩვენ ოკუპირებული ტერიტორიების სიახლოვეს შეიარაღებულ ფორმირებებს ვქმნით. ერეკლეს დროსაც იყო ერთი „თავისუფალი დემოკრატი“, რომელიც აღა–მაჰმად–ხანთან მივიდა და უთხრა, რომ ერეკლეს მეზარბაზნეები არ ჰყავსო“, – განაცხადა დეპუტატმა.

Internet.ge