ყოფილი ტელე-ჟურნალისტი და საკრებულოს დეპუტატი, ინგა გრიგოლია ამბობს, რომ მისი პარტიის მაღალი რეიტინგი, ჟურნალისტური მოღვაწეობისა და სწორი პოლიტიკური ორიენტაციის დამსახურებაა.

„ეს არის ძალიან მნიშვნელოვანი და იმედის მომცემი ჩვენთვის. იმედის მომცემი იმ თვალსაზრისით, რომ ჩვენ მომავალ საპარლამენტო არჩევნებში სერიოზულ შედეგს მივიღებთ. გარდა ამისა, ის ფაქტი, რომ პოლიტიკური ლიდერების ხუთეულში „ქრისტიან დემოკრატიული მოძრაობის“ სამი წევრი მოხვდა, მეტყველებს, რომ პარტიას სწორი კურსი ჰქონდა. რაც უნდა გვლანძღონ და ტალახი გვესროლონ, ხელისუფლებამ თუ ოპოზიციურმა პარტიებმა, ეს შედეგები მეტყველებს, რომ ჩვენ გვაქვს სწორად შერჩეული გზა და ვაკეთებთ სწორ აქცენტებს“- აცხადებს გრიგოლია.

ყოფილი ტელეწამყვანი აღნიშნავს, რომ "ქდმ"-ს ლიდერთა რეიტინგი სტარტს მათი ჟურნალისტური მოღვაწეობიდან იღებს.

„ჩვენ ბევრჯერ გვისაუბრია, რომ "ქდმ"-ს პლუსია ჩვენ პარტიაში ყველა ძალიან ცნობადი სახე რომ არის. ხშირად დისკრედიტაციის მიზნით "ცნობილი ჟურნალისტების პარტიად" მოგვიხსენიებენ. ჩვენი სახელები და გვარები იმ პერიოდიდან მოდის, როცა ოპოზიციას ეძინა და არავინ არაფერს ამბობდა. იმ პერიოდში გიორგი თარგამაძე და მისი გუნდი საზოგადოებას აცნობდა ინფორმაციას, თუ რა ხდებოდა რეალურად ქვეყანაში. ამიტომ ვფიქრობ, რომ  რეიტინგი სტარტს იღებს სწორედ ჩვენი ჟურნალისტური მოღვაწეობიდან და შემდეგ გრძელდება იმით, რომ გვქონდა სწორი პოლიტიკური კურსი“- აცხადებს საკრებულოს დეპუტატი.

რაც შეეხება იმ ფაქტს, რომ საკრებულოს დეპუტატ ინგა გროგოლიას, კოალიცია „ქართული ოცნების“ ლიდერ ბიძინა ივანიშვილზე მაღალი რეიტინგი აქვს. გრიგოლიას ამ თემის კომენტირება არ სურს და მხოლოდ მცირე განცხადებით შემოიფარგლება. „რაც შეეხება ბიძინა ივანიშვილს ან სხვა პარტიებს, ამ თემის კომენტირების სურვილი არ მაქვს. მთელი ამ დროის განმავლობაში მათგან წამოსული ლაფის და ნიაღვრის მიუხედავად, ჩვენ არავის დავტაკებივართ და არ დაგვიწყია საპასუხოდ ტალახის სროლა. ამიტომ ამ საკითხზე არც კომენტარის გაკეთება მსურს“-ამბობს გრიგოლია. 

Internet.ge