"ახალი მემარჯვენეების"  შიდა ქართლის რეგიონულ ორგანიზაციაში აცხადებენ, რომ სოფლის მოსახლეობა საკუთარ საკარმიდამო ნაკვეთებს უსახსრობის გამო ვერ იფორმებს. ამის შესახებ განცხადება დღეს გორის ორგანიზაციის ხელმძღვანელმა სოსი ბორცვაძემ გააკეთა.

მისი თქმით, საჯარო რეესტრში მიწის დარეგისტრირებას 300-500 ლარი სჭირდება და ხშირ შემთხვევაში გლეხს ეს თანხა არ გააჩნია.

„ხელისუფლება ხელოვნურად ქმნის ამ მდგომარეობას, რომ შემდეგ ეს მიწები აუქციონის წესით გაყიდოს. ამ ტენდენციამ სოფლებში მასიური ხასიათი მიიღო. გლეხების კუთვნილი სახნავ-სათესი და საძოვრები ისე იყიდება, რომ მეპატრონეები საქმის კურსშიც არ არიან.  სოფლად მიწის გარეშე გლეხის დარჩენა იმას ნიშნავს, რომ ის იქიდან უნდა აიყაროს და  წავიდეს. ამიტომ, "ახალი მემარჯვენეები"  ხელისუფლებას მოუწოდებენ  მიწის საკუთრებაში დარეგისტრირების პროცესის გამარტივებას და შეღავათიანი ტარიფის დაწესებას, რომელიც ხელმისაწვდომი  იქნება სოფლად მცხოვრები ადამიანებისთვის“,- განაცხადა ბორცვაძემ.

Internet.ge