„სამართლიანი სახელმწიფო, პატიოსანი ხელისუფლება, ღირსეული ცხოვრება!“ - ამ ლოზუნგით კიევში გაერთიანებული ოპოზიციის ფორუმი ჩატარდა. „ევრონიუსის“ ინფორმაციით, მას 2 ათასზე მეტი ადამიანი ესწრებოდა.

ფორუმის მონაწილე 6 პარტიის ლიდერებმა და აქტივისტებმა ერთხმად მიიღეს სამოქმედო პროგრამა, რომელიც მოსახლეობისთვის მალე გახდება ცნობილი.

იულია ტიმოშენკოს ქალიშვილმა შეკრებილებს წაუკითხა პატიმრობაში მყოფი ექს-პრემიერის წერილი. მასში ტიმოშენკო აღნიშნავს, რომ შეიმუშავა სამართალდამცავი სისტემის რეფორმა, რომელიც პრეზიდენტის იმპიჩმენტის პროცედურასაც ითვალისწინებს.

„ჩვენ უნდა ვიბრძოლოთ ახალი სახელმწიფოსთვის, ახალი პოლიტიკური ელიტისთვის, ხელისუფლების პასუხისმგებლობისა და ანგარიშვალდებულებისთვის, ჩვენ უნდა ვიბრძოლოთ კორუფციის წინააღმდეგ! - განაცხადა „ცვლილებების ფრონტის“ ლიდერმა არსენი იაცენიუკმა, - ჩვენ გულწრფელად გვჯერა, რომ უკრაინა ძლევამოსილი ევროპის ნაწილი გახდება. ჩვენ უნდა მოვახდინოთ უკრაინა-ევროკავშირის შეთანხმების რატიფიცირება, რადგან ჩვენ - პროევროპულად განწყობილი ქვეყანა ვართ.“

ლიდერთა განცხადებით, ოპოზიცია საერთო ძალებით წარმართავს წინასაარჩევნო კამპანიას ოქტომბერში დაგეგმილი საპარლამენტო არჩევნებისთვის და მის შემდეგაც ერთიანი დარჩება.

Internet.ge