ნიკოლა სარკოზი საფრანგეთის ახალ პრეზიდენტს ფრანსუა ოლანდს პრეზიდენტობას დღეს გადააბარებს. 

პრეზიდენტად დანიშვნამდე ფრანსუა ოლანდი თავის თანაპარტიელებს გამოემშვიდობა. მისი თქმით, იგი აპირებს „გახდეს ყველა ფრანგის პრეზიდენტი“, რაც გარკვეული წესების დაცვას გულისხმობს. პირველ რიგში, ეს ეხება სოციალისტებისგან თავის შორს დაჭერას, - იტყობინება „ევრონიუსი“.

სპეციალისტები ამბობენ, რომ ამ გამომშვიდობებით, ოლანდმა ახალ წინასაარჩევნო კამპანიას ჩაუყარა საფუძველი. სოციალისტები იმედოვნებენ, რომ ეროვნული ასამბლეის არჩევნებშიც ასეთივე წარმატებით გაიმარჯვებენ.

დღევანდელი ცერემონიალი ტრადიციის დაცვით ჩატარდება: ოლანდი მიიღებს მილოცვებს და საპატიო ლეგიონის გროსმეისტერის ჯაჭვს, რის შემდეგაც, ახალი პრეზიდენტი ავტომობილით ქალაქში გაისეირნებს. ამისთვის ოლანდმა ჰიბრიდული „სიტროენის“ უკანასკნელი მოედლი აირჩია.

გასეირნების შემდეგ პრეზიდენტი პარიზის მერიას ესტუმრება, სადაც ქალაქის მედალს მიიღებს და რაც მთავარია, იქვე დაასახელებს ახალი პრემიერ-მინისტრის სახელს.

დღესვე საღამოს ოლანდი პრეზიდენტის რანგში პირველი ოფიციალური ვიზიტით გერმანიაში გაემგზავრება, სადაც კანცლერს ანგელა მერკელს შეხვდება.

გერმანიის კანცლერმა უკვე არაერთხელ აღნიშნა, რომ არ აპირებს მკაცრ ეკონომიკურ პოლიტიკაზე უარის თქმას და არც სტაბილურობის პაქტის გადახედვას დათანხმდება. თუმცა, საფრანგეთის ახალი პრეზიდენტი აპირებს კორექტირება მოახდინოს ფინანსურ შეთანხმებებში, რომლებიც სარკოზიმ გააფორმა. მოგვიანებით კი, შეხვედრის შემდეგ ოლანდი და მერკელი ერთობლივ პრესკონფერენციას გამართავენ.

internet.ge