„ქრისტიან-დემოკრატები“ მმართველი გუნდის მიერ მომზადებულ საკონსტიტუციო ცვლილების ბოლო ფორმულირებას არ ეთანხმებიან.

როგორც ჟურნალისტებს ლევან ვეფხვაძემ განუცხადა, მათ საკონსტიტუციო ცვლილებებთან დაკავშირებით, საკუთარი ალტერნატიული პროექტი აქვთ. მათი ინიციატივა ევროკავშირის წევრი ქვეყნის მოქალაქის საქართველოში ცხოვრების ბოლო 3 წლიან ცენზს უკავშირდება.

„კონსტიტუციაში ბოლო 10 წლიან ან 5 წლიანი ცენზის ჩაწერას არ ვეთანხმებით.  კონსტიტუციაში კონკრეტული რიცხვი უნდა ეწეროს და არა ჰაერიდან მოტანილი ციფრები,“ – აცხადებს კანონმდებელი.

წარდგენილი ცვლილებებით, 2014 წლის 1 იანვრამდე, საპარლამენტო და საპრეზიდენტო არჩევნებში მონაწილეობის და ხმის მიცემის უფლება საქართველოს მოქალაქეებთან ერთად, აქვთ ევროკავშიის წევრი სახელმწიფოს მოქალაქეობის მქონე შესაბამისი ასაკის პირებსაც, რომლებიც დაბადებული არიან და ბოლო 5 წელი მუდმივად ცხოვრობენ საქართველოში.  

დღევანდელ პლენარულ სხდომაზე, ცვლილებების მეორედ მოსმენით განხილვისას, „ქრისტიან–დემოკრატები“ ალტერნატიულ წინადადებას წარადგენენ.

Internet.ge