"ქრისტიან-დემოკრატიული მოძრაობის" ლიდერები აზერბაიჯანელმა მესაზღვრეებმა  უდაბნოს მონასტრის ტერიტორიაზე არ შეუშვეს. ამის შესახებ „ინტერნეტ.ჯი“-ს „ქდმ“-ს ერთ-ერთმა ლიდერმა გიორგი ახვლედიანმა განუცხადა.

მისი თქმით, პარტიის წევრები დღეს, აზერბაიჯანთან სადაო ტერიტორიების მონახულების მიზნით, დავით გარეჯის სამონასტრო კომპლექსს სტუმრობდნენ.

„აზერბაიჯანული მხარე უდაბნოს მონასტერში მომსახურე სასულიერო პირებთან კორექტულია და მათ აღნიშნულ მონასტერში შესვლის უფლებას აძლევს. შეზღუდვა უბრალო მომლოცველებზე წესდება. დღეს, ჩვენთან ერთად იყო ქორ-ეპისკოპოსი იაკობი, რომელიც მონასტრის ტერიტორიაზე თავისუფლად გადავიდა“,- განაცხადა ახვლედიანმა.

მისივე განცხადებით, აზერბაიჯანთან კეთილმეზობლური ურთიერთობის მიუხედავად, საქართველოს ხელისუფლებამ გარეჯის სადაო ნაწილთან მიმართბაში, არც ერთი ნაბიჯით არ უნდა დაიხიოს უკან.

„ამ საკითხთან დაკავშირებით, ქართული მხარე წმინდა წყალივით მართალია აზერბაიჯანულ მხარესთან, რადგან ჯერ კიდევ გასული საუკუნის 80-იან წლებში ტერიტორია, რომელზეც ახლა დავა მიმდინარეობს, საქართველოს შემადგენლობაში სახელდებოდა. მოგეხსენებათ, რომ ორ ქვეყანას შორის საზღვრების დადგენა 1921 წლიდან დაიწყო და დღემდე გრძელდება, ამიტომ მსგავსი სახის განცხადებები, რომელიც ბოლო დღეებია ქართველი პოლიტიკოსებისგან გვესმის სიცრუეა. ჯანდარის ტაძარი და მდინარე იორი აზერბაიჯანულ მხარეს არც კომუნისტების დროს და არც მანამდე ეკუთვნოდათ. ეს ტერიტორია მათ მიითვისეს“,- განმარტა ახვლედიანმა და აქვე დასძინა რომ ამ თემით სპეკულირება ქვეყნისთვის საზიანოა.

დავით გარეჯის სამონასტრო კომპლექსი გიორგი ახვლედიანმა, ზაზა გაბუნიამ და ჯაბა სამუშიამ მოინახულეს.

Internet.ge