საქართველოს პრეზიდენტის შეფასებით, საქართველო მენტალურად და ეკონომიკურად წარმატებული ქვეყანაა. 

როგორც პრინსტონის უნივერსიტეტში სიტყვით გამოსვლისას მიხეილ სააკაშვილმა განაცხადა, საქართველო, რეგიონში კაშკაშა მაგალითად იქცა.

მისი თქმით, საქართველო კარიბჭეა ცენტრალურ აზიას, კასპიის რეგიონსა და ევროპას შორის. ის წარმოადგენს დიდ სატრანზიტო მარშრუტს ცენტრალური აზიიდან, ჩრდილოეთ ჩინეთიდან და ავღანეთიდან ევროპისკენ.

“ბევრი რამ ჯერ ისევ გასაუმჯობესებელია. ჩვენ მიზნამდე ჯერ კიდევ შორია, რადგან წინ გვაქვს არჩევნები და გვინდა ისინი გამჭვირვალედ ჩავატაროთ. საქართველო წარმატებულია მენტალურად, ეკონომიკურად, ტრანსფორმირებული ვიზუალურად - ის რეგიონეში კაშკაშა მაგალითად იქცა", - აღნიშნა საქართველოს პრეზიდენტმა.

ქვეყნის პირველი პირის განცხადებით,  ვარდების რევოლუციის შემდეგ, ქვეყანაში ყველაფერი რადიკალურად შეიცვალა - ხელისუფლებამ სახელმწიფო ინსტიტუტების მშენებლობა და გაძლიერება დაიწყო, რაც მენტალური რევოლუციის საფუძველი გახდა.  

ინსტიტუციონალური რეფორმის განხორციელების შედეგად, მიხეილ სააკაშვილის განცხადებით, საქართველო რეგიონში მისაბაძი მაგალითი გახდა და ამ წარმატებული რეფორმების გაზიარების მიზნით, დელეგაციები თითქმის ყველა ქვეყნიდან მათ შორის, რუსეთიდანაც ჩამოდის. როგორც პრეზიდენტმა აღნიშნა, რეფორმები მთელი რეგიონის მასშტაბით უნდა  განხორციელდეს, რადგან გარშემო მყოფი ქვეყნების განვითარებას საქართველოსთვისაც დიდი მნიშვნელობა აქვს.

ქვეყნის ლიდერმა მომავალ პოლიტიკოსებს რჩევაც მისცა.

„არაფერი არ მიიღოთ ისე, როგორც ჩანს - ზოგი რამ უნდა უგულებელყოთ, ზოგჯერ საკუთრი თავი კრიტიკულად უნდა შეაფასოთ; ნუ დაეყრდნობით გაბატონებულ დოგმებს, უბრალოდ, იყავით გამბედავი, იმოქმედეთ და ყველაფერი კარგად იქნება“, - განუცხადა მათ  პრეზიდენტმა.

Internet.ge