აშშ-ის წარმომადგენლობითი პალატის წევრმა ილეანა როს-ლეტინენმა, რომელიც საგარეო საქმეთა კომიტეტს ხელმძღვანელობს, განცხადება გაავრცელა, რომელშიც შეერთებული შტატების ხელისუფლებას მოუწოდებს მხარი დაუჭიროს საქართველოს სწრაფვას ჩრდილოატლანტიკური ალიანსისკენ. განცხადება კომიტეტის ვებ-გვერდზეა გამოქვეყნებული.

"საქართველომ არაერთგზის დაამტკიცა, რომ ის შეერთებული შტატების სანდო მეგობარი და სტრატეგიული პარტნიორია და დადგა დრო, აშშ-მა მომავალშიც მოახდინოს დემონსტრირება საქართველოს სუვერენიტეტის დაცვისა… „შეერთებულა შტატებმა, ასევე, მხარი უნდა დაუჭიროს საქართველოს ნატოში გაწევრიანებას“,-აღნიშნავს როს-ლეტინენი და იქვე საუბრობს აშშ-ის ინტერესების სასარგებლოდ  „საქართველოს მნიშვნელოვან წვლილზე“, ავღანეთისა და ერაყის  მისიებში მონაწილეობაზე.

„საქართველოს უსაფრთხოებას და სუვერენიტეტს  გადამწყვეტი მნიშვნელობა აქვს რეგიონში აშშ-ის ინტერესებისთვის. საქართველო რუსებმა მიიტაცეს და მისი ტერიტორიის დიდი ნაწილი რუსეთის ოკუპაციის ქვეშ რჩება… მე გადაჭრით მოვითხოვ ჩვენი ადმინისტრაციისგან, იმუშაონ ჩვენს მოკავშირეებთან ჩიკაგოში, ნატოს სამიტზე, რათა საქართველო, რაც შეიძლება მალე გახდეს ალიანსის სრულფასოვანი წევრი“ - ნათქვამია როს-ლეტინენის განცხადებაში.

Internet.ge