ჩიკაგოში მიმდინარე ჩრდილოტლანტიკური ალიანსის სამიტზე აშშ-ის სახელმწიფო მდივანმა ჰილარი კლინტონმა განაცხადა, რომ ნატოს წევრი ქვეყნების ლიდერთა მომავალ შეხვედრაზე სამხედრო ალიანსის გაფართოების საკითხი აუცილებლად უნდა დადგეს.

ეს განცხადება კლინტონმა ნატოს ასპირანტი ქვეყნების წარმომადგენლებთან - საქართველოს, ბოსნიის, მაკედონიისა და ჩერნოგორიის დელეგაციებთან შეხვედრისას გააკეთა. 

მართლია, ალიანსის წევრი ქვეყნების ლიდერთა მომავალი შეხვედრის დრო და ადგილი ჯერ-ჯერობით, უცნობია, მაგრამ კლინტონის თქმით, ჩიკაგოს სამიტი ბოლო უნდა იყოს, რომელზეც ნატოს გაფართოება არ მომხდარა.

აშშ-ის სახელმწიფო მდივანმა აღნიშნა, რომ საქართველომ წარმატებით განახორციელა დემოკრატიული რეფორმები, ხოლო მომავალი საპარლამენტო და საპრეზიდენტო არჩევნები კი დამატებითი შესაძლებლობა იქნება იმისთვის, რომ ამ ქვეყანამ დემოკრატიული ღირებულებებისადმი ერთგულება დაამტკიცოს.

ჰილარი კლინტონმა დაადასტურა საქართველოს ტერიტორიული მთლიანობისა და სუვერენიტეტისადმი მხარდაჭერა, განაცხადა, რომ მიესალმება საქართველოს მიერ აღებულ ვალდებულებას ძალის გამოუყენებლობის შესახებ და ანალოგიური ნაბიჯებისკენ რუსეთსაც მოუწოდა.

ალიანსის წევრობის პირველ კანდიდატად მაკედონია განიხილება, შემდეგი კი უკვე საქართველოა. რაც შეეხება ბოსნიასა და ჩერნოგორიას, იქ მხოლოდ ახლა იწყება რეფორმები, რომელთა გატარებაც სამხედრო ბლოკთან მიერთებისთვის არის აუცილებელი.

Internet.ge