საპარლამენტო უმრავლესობის ლიდერი, პეტრე ცისკარიშვილი იმედს გამოთქვამს, რომ დავით გარეჯთან დაკავშირებით, ოპოზიციონერები ისეთ პროვოკაციებს არ წამოიწყებენ, რომელიც ორ მეგობარ სახელმწიფოს შორის ურთიერთობაზე უარყოფითად აისახება.  

როგორც დღევანდელ პლენარულ სხდომაზე, ოპოზიციის საპასუხოდ, ცისკარიშვილმა განაცხადა, ბოლო დღეების განმავლობაში, დავით გარეჯთან დაკავშირებით, არა ერთი პროვოკაციული განცხადება გაჟღერდა.

მისი თქმით, აზერბაიჯანი საქართველოს მეგობარი სახელმწიფოა, დავით გარეჯის ძირითადი კომპლექსი კი, იყო და არის საქართველოს შემადგენლობაში, ხოლო ის მცირე ნაწილი, რომელიც წლების განმავლობაში, სადაო იყო, მიმდინარე მოლაპარაკებების საგანია. 

„სამწუხაროდ, დემარკაცია-დემილიტაციის პროცესი დასრულებული არ არის, მაგრამ სააკაშვილსა და ალიევს შორის შეხვედრის შემდეგ, ეს პროცესი დაჩქარდება. შესაბამისი დიპლომატიური სამსახურები მუშაობენ,  რათა საბოლოოდ საზღვრის დელიმიტაცია მოხდეს“, – განაცახდა ცისკარიშვილმა.

Internet.ge