„კავკასიის იმარატის“ ლიდერმა დოკუ უმაროვმა რუსეთის მუსულმანებისათვის მორიგი ვიდეომიმართვა გაავრცელა. უმაროვის ბოლო ასეთი მიმართვა იყო, არ განეხორციელებინათ ტერორისტული აქტები მშვიდობიანი მოსახლეობის წინააღმდეგ, თუმცა ამჯერად, ის რუსეთის მუსულმანებს ჯიჰადისკენ მოუწოდებს.

თავის მიმართვაში უმაროვი  აქცენტს რუსეთის ხელისუფლების წინააღმდეგ ბრძოლის წარმოებაზე აკეთებს და მოუწოდებს მუსულმანებს, არ იყვნენ „გულგრილნი“ იმ მოვლენებისადმი, რომლებიც დღეს კავკასიაში ხდება.

ის, ასევე, მიმართავს რუსეთის ხელისუფლებას და მოჰყავს იმ ახალგაზრდის მაგალითი, რომელიც ვიდეომიმართვისას მის გვერდით დგას. 

კრემლის საყურადღებოდ, უმაროვი აცხადებს, რომ მათი რიგები ივსება და ამ ახალგაზრდა მამაკაცმაც თავისი მამის ადგილი დაიკავა „კავკასიის იმარატის“ მებრძოლებს შორის.

„თქვენ ვერ წაართმევთ მოჯაჰედებსა და კავკასიის მუსულმანებს ალაჰისადმი რწმენას. ამიტომ ყველაფერი, რასაც თქვენ აკეთებთ, უაზრობაა და თქვენთვის ეფექტი არ ექნება - „ინშალაჰ“. და ჩვენ გავიმარჯვებთ, და ჩვენ „ინშალაჰ“  დავამყარებთ კავკასიაში შარიათს“ - აცხადებს უმაროვი.

Internet.ge