შინაგან საქმეთა სამინისტროს ანალიტიკური დეპარტამენტის ხელმძღვანელის, შოთა უტიაშვილის განცხადებით, რამდენიმე დღის წინ, ოსი  სამართალდამცავების მიერ დაკავებული ოთხი ქართველი ამ დრომდე გათავისუფლებული არ არის.

უტიაშვილმა „ინტერნეტ.ჯი“-სთან საუბრისას იმედი გამოთქვა, რომ ოსი სამართალდამცავები ერგნეთში, ინციდენტების პრევენციისა და მათზე რეაგირების სამუშაო ჯგუფის შეხვედრაზე მიღწეულ შთანხმებას შეასრულებენ და საქართველოს ხუთივე მოქალაქე დღის ბოლომდე თავისფალი იქნება.

ცნობისთვის, ერგნეთში გუშინ გამართულ ოთხმხრივ შეხვედრაზე გადაწყდა, რომ ერედვში დაკავებული 4 მოქალაქე, რომლებიც დაკავებისას ცხინვალის რეგიონის ადმინისტრაციული საზღვრის გავლით ჯონჯოლის მოსაკრეფად იმყოფებოდნენ, დღეს დილით გათავისუფლდებოდნენ. მათთან ერთად საპყრობილე კიდევ ერთმა ქართველმა უნდა დატოვოს, რომელიც მაშინ დააკავეს, როდესაც დედის საფლავზე სანთლის დასანთებად იყო გადასული.

ინციდენტებისა და მასზე რეაგირების ფარგლებში მორიგი შეხვედრა 21 ივნისს გაიმართება.

Internet.ge