საქართველოს საგარეო საქმეთა სამინისტრო, ამ ეტაპზე, საქართველოში ამერიკის შეერთებული შტატების სახელმწიფო მდივან ჰილარი კლინტონის ვიზიტის საბოლოო პროგრამას არ აკონკრეტებს.

როგორც ორშაბათის ტრადიციულ ბრიფინგზე საგარეო საქმეთა მინისტრის მოადგილე ნინო კალანდაძემ განაცხადა, ვიზიტის ფარგლებში კლინტონი საქართველო-ამერიკას შორის გაფორმებულ თანამშრომლობის ქარტიის ფარგლებში დაგეგმილ შეხვედრას დაესწრება, რომელსაც საქართველოს პრემიერ-მინისტრი ნიკა გილაური უხელმძღვანელებს. 

„საბოლოო პროგრამა ჯერ ბოლომდე ცნობილი არ არის, ამაზე პასუხისმგებელი ამერიკული მხარეა. იმ სავარაუდო პროგრამით, რაც ჩვენთვისაა ცნობილი, ქალბატონი კლინტონი 5 ივნისს ეწვევა ქალაქ ბათუმს, სადაც გაიმართბა ქარტიის ფარგლებში ოფიციალური შემაჯამებელი შეხვედრა. ასევე დაგეგმილია ოთხი ძირითადი სამუშაო ჯგუფის შეხვედრა, ეს არის თავდაცვისა და უსაფრთხოების, დემოკრატიისა და მმართველობის, ასევე ეკონომიკის, ენერგეტიკის და ვაჭრობის სფეროში სამუშაო ჯგუფის შეხვედრა და ხალხთაშორისი და კულტურული თანამშრომლობის სამუშაო შეხვედრა“,- განაცხადა ნინო კალანდაძემ.

მინისტრის მოადგილის შეფასებით, აშშ-ს სახელმწიფო მინისტრის ვიზიტი, ქვეყნის მისწრაფებების მხარდაჭერას ადასტურებს.

მისივე განცხადებით, ქართული მახარე დაკისრებულ მოვალეობას წარმატებით ართმევს თავს.

Internet.ge