სეულის ბირთვულ სამმიტზე აგორებული სკანდალი ბარაკ ობამასა და დიმიტრი
მედვედევს შორის გამართული გახმაურებული დიალოგის შესახებ, ღრმავდება.
ობამას 40 რესპუბლიკელი სენატორი აუმხედრდა, რომლებმაც პრეზიდენტს
წერილი-ულტიმატუმი გაუგზავნეს. ისინი ობამას აშშ-ის ნაციონალური უსაფრთხოების
რუსეთის ინტერესების სასარგებლოდ ღალატში ადანაშაულებენ. ეს ბრალდება აშშ-ის
პრეზიდენტის წინააღმდეგ, უკვე რესპუბლიკელების მთავარ იარაღად იქცა.
სენატის რესპუბლიკელთა ფრაქციამ, თითქმის ერთსულოვნად დაუჭირა მხარი
ოაბასადმი მიმართვას. ისინი მოითხოვენ პრეზიდენტისგან, არ გადადგას შემხვედრი ნაბიჯები
მოსკოვთან ანტისარაკეტო თავდაცვის სისტემებთან დაკავშირებით.
„ამერიკელების აზრის უგულებელყოფა ამ მნიშვნელოვან საკითხზე ჩვენს უსაფრთხოებას
ემუქრება“ - წერენ მიმართვის ავტორები.
მართალია, ბარაკ ობამამ სეულის სკანდალური დიალოგის მეორე დღესვე გააკეთა
განცხადება, რომ არ აპირებს რუსეთთან თანამშრომლობის დეტალები დაუმალოს
ამერიკელებს, მაგრამ მისმა მოწინააღმდეგემ მომავალ საპრეზიდენტი არჩევნებში -
რესპუბლიკელმა მიტ რომნიმ, თემა მაქსიმალურად გაამწვავა. და არა მარტო ობამას
მიმართ. რომნიმ რუსეთს აშშ-ის „ნომერ პირველი გეოპოლიტიკური მტერი უწოდა“.
მოგვიანებით კი, ჟურნალ Foreign Policy-ში დაწერა, რომ „რუსებს, აშკარად
სურთ საქმე ჰქონდეთ თეთრი სახლის ამჟამინდელ ხელმძღვანელობასთან“. მან ანტისარაკეტო თავდაცვის სისტემის
საკითხში, აშშ-ის ადმინისტრაციის მოსკოვისადმი მიდგომას „კაპიტულანტური დათმობაც“
უწოდა.
თუმცა კონგრესის წარმომადგენლობითი პალატის სპიკერმა, ასევე
რესპუბლიკელმა ჯონ ბონერმა, რომნი „შეარცხვინა“, რადგან მან თავს უფლება მისცა პრეზიდენტი საზღვარგარეთული ვიზიტის დროს
გაეკრიტიკებინა, იმ მომენტში, როცა ის სხვადასხვა ქვეყნების ლიდერებთან
მოლაპარაკებებს აწარმოებდა.
ოთხშაბათს კი, რიგმა სენატორებმა ვაშინგტონის პოლიტიკურ
მიმომხილველს ჯოშ როგინს, რომელსაც ჟურნალ Foreign Policy-ის საიტზე
ბლოგი მიჰყავს, განუცხადეს, რომ არ ეთანხმებიან რომნის და არ თვლიან რუსეთს აშშ-ის
მტრად.
სენატის საერთაშორისო კომიტეტის თავმჯდომარე, დემოკრატი
ჯონ კერი თვლის, რომ ამერიკა-რუსეთის ურთიერთობის საქმე არც ისე ცუდადაა, როგორც
ამას რომნი წარმოაჩენს.
დამოუკიდებელმა სენატორმა ჯოზეფ ლიბერმანმაც
არ გაიზიარა რომნის პოზიცია, თუმცა აღნიშნა, რომ რუსეთში „დემოკრატიის დეფიციტია“.
Internet.ge
