პარლამენტის თავმჯდომარის, დავით ბაქრაძის შეფასებით, მნიშვნელოვანია არა მხოლოდ ის, რომ სახელმწიფო ადამიანებს აზღვევს, არამედ ისიც, რომ მზღვეველებმა დაზღვევის პაკეტებით სრულფასოვნად ისარგებლონ.

ამის შესახებ სპიკერმა ადიგენის საავადმყოფოში განაცხადა, სადაც უშუალოდ დაესწრო იმ გამოკვლევებს, რომელსაც სახელმწიფოს მიერ დაზღვეულები გადიან.

მისი თქმით, ხელისუფლების პრიორიტეტი ხელმისაწვდომი ჯანდაცვაა და  წელს საქართველოში ყოველი მეორე ადამიანი დაზღვევით ისარგებლებს.

„ეს პროცესის მხოლოდ დასაწყისია და ჩვენი ამოცანაა საბოლოოდ ყველა ადამიანი იყოს დაზღვეული, ყველა ოჯახს  ხელმისაწვდომი ჯანდაცვის და მკურნალობის საშუალება ჰქონდეს“, – დასძინა მან.

ამას გარდა, პარლამენტის თავმჯდომარე ახალციხის უნივერსიტეტსაც ეწვია, სადაც სასწავლებლის პროფესორ-მასწავლებლებსა და სტუდენტებთან გამართულ შეხვედრაზე, ყურადღება ჯანდაცვის რეფორმასა და სადაზღვევო პოლისებზე გამახვილდა.

ამასთან, ახალციხეში სტუმრობისას პარლამენტის თავმჯდომარემ ქალაქის ისტორიული უბნის - რაბათის სარეაბილიტაციო სამუშაოები დაათვალიერა.

შეგახსენებთ, რომ სარეკონსტრუქციო სამუშაოების დასრულება აგვისტოში იგეგმება, რომლის შემდეგაც მთლიანად რაბათის ციხე აღდგება და ისტორიულ უბანს ძველი იერსახე დაუბრუნდება. 

internet.ge