წამყვანი დასავლური ქვეყნები სირიიდან ელჩებსა და დიპლომატებს უკან იწვევენ. ამის მიზეზი რამდენიმე დღის წინ, სოფელ ჰულაში მომხდარი მასობრივი სისხლისღვრაა.

სირიის ხელისუფლების ქმედებების წინააღმდეგ პროტესტი ამგვარი ნაბიჯით აშშ-მ, ბრიტანეთმა, საფრანგეთმა, გერმანიამ, ესპანეთმა, იტალიამ, ავსტრალიამ და კანადამ გამოხატეს.

ბრიტანეთის საგარეო საქმეთა მინისტრმა უილიამ ჰეიგმა განაცხადა, რომ კოფი ანანის სამშვიდობო გეგმის შესრულების ვადები იწურება და დამასკომ უნდა გადაწყვიტოს, როგორ მოიქცევა შემდგომში. თავად ანანმა სირიის პრეზიდენტ ბაშარ ასადთან შეხვედრისას აღნიშნა, რომ მისი გეგმა ცალსახად მოითხოვს ძალადობის სრულად შეწყვეტას.

ჰულაში სროლების შედეგად 100-ზე მეტი მშვიდობიანი მოქალაქე დაიღუპა, მათ შორის 30-ზე მეტი ბავშვი. სირიის ხელისუფლება და ოპოზიცია მომხდარში ერთმანეთს ადანაშაულებენ. 

internet.ge