რუსეთი მის მიერ შეთავაზებულ პროექტზე, „ძალის გამოუყენებლობაზე ერთობლივი განცხადების შესახებ“, ჟენევის დისკუსიების მონაწილეთაგან პასუხს ელოდება -  განაცხადა რუსეთის საგარეო საქმეთა მინისტრის მოადგილემ გრიგორი კარასინმა. პროექტი ჟენევაში მარტში ჩატარებულ შეხვედრაზე იქნა წარდგენილი.

„ძალაში რჩება რუსეთის წინადადება უსაფრთხოების ერთობლივი საერთაშორისო გარანტიების შესახებ, რომელიც გაამყარებს 2010 წელს ძალის გამოუყენებლობის შესახებ აფხაზური, ქართული და სამხრეთ ოსური მხარეების მიერ აღებულ ცალმხრივ ვალდებულებებს“ - განაცხადა კარასინმა.

გარდა ამისა, რუსეთის საგარეო უწყების ინფორმაციით, ჟენევაში იგეგმება „აფხაზეთისა და სამხრეთ ოსეთის საქართველოსთან საზღვრებზე“ არსებული სიტუაციისა და ინცინდენტების პრევენციისა და მათზე რეაგირების ერთობლივი მექანიზმების განხილვა.

ამასთან, 7 ივნისს, მოლაპარაკებათა რაუნდის წინა დღეს, ჟენევაში ცხინვალის დელეგაცია ინფორმაციული სესიის ჩატარებას გეგმავს, რომელიც ტერმინ „ოკუპაციისა“ და „ოკუპირებული ტერიტორიების“ გაგების სამართლებრივ ასპექტებს შეეხება.

როგორც ცნობილია, მარიონეტული რეჟიმები აპროტესტებენ იმას, რომ მათ ოკუპირებულ ტერიტორიებს უწოდებენ.

Internet.ge