საგარეო საქმეთა მინისტრის, გრიგოლ ვაშაძის შეფასებით, აშშ-ს სახელმწიფო მდივნის, ჰილარი კლინტონის ვიზიტი წარმატებული და ემოციურად დატვირთული იყო.

როგორც ბათუმის აეროპორტში, კლინტონის გაცილების შემდეგ ვაშაძემ განაცხადა,

ქართულ-ამერიკული ურთიერთობები სამხედრო სფეროში, ახალ ეტაპზე გადადის.

„წინა ვიზიტის დროს კლინტონი საქართველოში დაბრუნებას დაგვპირდა და ასეც მოიქცა. ახლა კი კვლავ განაცხადა, რომ ის ჩვენთან აუცილებლად ჩამოვა. თუ გავიხსენებთ, რა თემები გამოყო თავად კლინტონმა პრესკონფერენციის დროს, ადვილი მისახვედრია პოლიტიკურად რამდენად მნიშვნელოვანი იყო ეს ვიზიტი.

საქართველოსა და შეერთებული შტატების სამხედრო თანამშრომლობა ნამდვილად გადადის სხვა ეტაპზე“,- განაცხადა ვაშაძემ.

მინისტრის შეფასებით, საქართველოს ახალი ბაზრები და ინვესტიცების მოზიდვა სჭირდება.

„საქართველოსთვის ყველაზე დიდი დახმარება ახლა რაც შეიძლება მეტი დამკვირვებლის გამოგზავნა იქნება და ეს დაპირება ჩვენ კლინტონისგან მივიღეთ. ჩვენ არჩევნებს ჩავატარებთ უმაღლესი ევროპული და დემოკრატიული სტანდარტებით, მაგრამ ამისათვის მეგობრების დახმარება გვჭირდება“,- განაცხადა ვაშაძემ.

internet.ge