„ქრისტიან–დემოკრატები“ და „ევროპელი–დემოკრატები“, 2012 წლის საპარლამენტო არჩევნებზე, ერთ ბლოკად გაერთიანებას გეგმავენ.

ამის შესახებ ‘’ინტერნეტ.ჯი"–ს ინფორმირებულმა წყარომ აცნობა.

მისი ცნობით, გიორგი თარგამაძის მოძრაობისა და პაატა დავითაიას პარტიის გაერთიანებასთან დაკავშირებით, პოლიტიკურ ლიდერებს შორის კონსულტაციები უკვე გაიმართა და გადაწყდა, რომ ისინი არჩევნებზე ერთ ბლოკად წარდგებიან.

ინფორმაციის გადაწმებას ‘’ინტერნეტ.ჯი" პარტიის ლიდერებთან შეეცადა.

როგორც ‘’ინტერნეტ.ჯი"–ს „ევროპელი დემოკრატების“ ლიდერმა, პაატა დავითაიამ განუცხადა, თვითმართველობის არჩევნებზე, აღნიშნული პარტიების გაერთიანებამ წარმატებას მიაღწია.

მისი თქმით, ბლოკის ჩამოყალიბებასთან დაკავშირებით, კონსულტაციები უკვე მიმდინარეობს და პარტიის ლიდერები პრაგმატულ გადაწყვეტილებას მიიღებენ.

„თვითმართველობის არჩევნებზე, ჩვენ წარმატებული ბლოკი გვქონდა და უმცირესობის ფორმატშიც, კარგი ურთიერთობა გვაქვს, თუმცა, თქვენ ინფორმაციას არც ვადასტურებ და არც უარვყოფ“, – განაცხადა დავითაიამ.

რაც შეეხება „ქრისტიან–დემოკარტებს“, ვიცე–სპიკერის, ლევან ვეფხვაძის განცხადებით, ამ ეტაპზე, ‘’ქდმ" პოლიტიკურ ბლოკში გაერთიანების აუცილებლობას ვერ ხედავს.

„ჯერჯერობით ამ ინფორმაციას ვერ დავასატურებ, რადგან ამ ეტაპზე,  ბლოკში გაერთიანება სწორად არ  მიგვაჩნია. სანამ, საარჩევნო კამპანია არ დაიწყება და ძირითადი სუბიექტები არ გამოიკვეთება, ბლოკის ჩამოყალიბებაზე საუბარი არ არის“, – დასძინა მან.

შეგახსენებთ, რომ  „ქრისტიან–დემოკრატები“, ‘’ევროპელი დემოკრატები“ და „ქრისტიან-დემოკრატიული სახალხო პარტია“ 2010 წელს, თვითმართველობის არჩევნებზე,  ერთ ბლოკად წარსდგა.

internet.ge