აშშ-ის ადმინისტრაციამ გადაწყვიტა, ამნისტია გამოუცხადოს ახალგაზრდა არალეგალ იმიგრანტებს და მათ ქვეყანაში დარჩენისა და მუშაობის შესაძლებლობა მისცეს. ამის შესახებ ოფიციალურად პრეზიდენტმა ობამამ განაცხადა. მისი ინიციატივა შესაძლოა 800 000-მდე ადამიანს შეეხოს.

ამერიკის ეროვნული უსაფრთხოების მინისტრმა ჟანეტ ნაპოლიტანომ განმარტა, თუ ვის შეიძლება შეეხოს ამნისტია. კანდიდატები შემდეგ კრიტერიუმებს უნდა აკმაყოფილებდნენ: აშშ-ში ჩამოსული უნდა იყოს 16 წლის ასაკში მშობლებთან ერთად და ქვეყნის ტერიტორიაზე ცხოვრობდეს მინიმუმ 5 წელი; ამ პერიოდის განმავლობაში დამთავრებული უნდა ჰქონდეს სკოლა, ან მოხდილი უნდა ჰქონდეს სამხედრო სამსახური, და არც ერთხელ არ უნდა ჰქონდეს დარღვეული კანონი; ამასთანავე, მოცემული დროისთვის, მისი ასაკი 30 წელს არ უნდა აღემატებოდეს.

ვინც ამ მოთხოვნებს აკმაყოფილებს, შეუძლია დარჩეს ამერიკაში და მიიღოს მუშაობის უფლება 2 წლით, ამ ვადის გახანგრძლივების პერსპექტივით. ადმინისტრაციის განცხადებით, ეს არ ნიშნავს მოქალაქეობის მინიჭებას - ამასთან დაკავშირებით ცალკე განაცხადის შეტანაა საჭირო.

იმიგრანტებს, რომლებიც მოცემულ კრიტერიუმებს ვერ აკმაყოფილებენ, დეპორტაციას გაუკეთებენ. გასულ წელს ამერიკიდან 400 ათასი ადამიანი იქნა დეპორტირებული. წინასწარი ინფორმაციით, წელსაც არანაკლებ მაჩვენებელს ელიან.

Internet.ge