საქართველოში, საპარლამენტო არჩევნებს საერთაშორისო ორგანიზაციების ფარგლებში, პოლონელი დეპუტატებიც დააკვირდებიან.

ამის შესახებ საქართველოს პარლამენტის თავმჯდომარე, დავით ბაქრაძემ  პოლონელ კოლეგასთან, ბოგდან ბორუსევიჩთან ერთობლივად გამართულ პრესკონფერენციაზე განაცხადა.

მისი თქმით, შეხვედრაზე მხარეებმა ქვეყნებს შორის ურთიერთობაზე, ოკუპირებულ ტერიტორიებზე, ქართულ–რუსულ ურთიერთობებსა და   საპარლამენტო არჩევნებზე ისაუბრეს.

ბაქრაძის თქმით,  შეხვედრაზე ასევე ისაუბრეს როგორ გაგრძელდება ქვეყნებს შორის პარტნიორობა საერთაშორისო არენაზე, მათ შორის განსაკუთრებით მნიშვნელოვანია ევროკავშირთან დაახლოება და ნატოში გაწევრიანება.

„თავის დროზე, სწორედ, პოლონეთის ინიციატივა იყო აღმოსავლეთ პარტნიორობის შექმნა. პოლონეთის პრეზიდენტობა ევროკავშირში საქართველოსთვის ძალიან წარმატებული პერიოდია, როდესაც ჩვენ დავიწყეთ მოლაპარაკებები თავისუფალი ვაჭრობის ასოცირებული შეთანხმების შესახებ. იმედი მაქვს, რომ ასეთი მჭიდრო თანამშრომლობით, საქართველო გაისად მოლაპარაკების იმ ძირითად ნაწილს დაასრულებს, რომელიც შეეხება თავისუფალ ვაჭრობას, საქართველოს მოქალაქეების უვიზოდ გადაადგილებასა და საქართველოს ასოცირებულ წევრობას“, – განაცხადა ბაქრაძემ.

სპიკერის თქმით, შეხვედრაზე საუბარი ასევე შეეხო მომავალ საპარლამენტო არჩევნებს.

„მოხარული ვარ, რომ სტუმრებისგან თანხმობა მივიღეთ და პოლონელი პარლამენტის წევრები აუცილებლად ჩამობრძანდებიან და არჩევნებს დააკვირდებიან. არჩევნებზე, რაც უფრო მეტი ადამიანი ჩამოვა, ეს მით უკეთესი იქნება ქართული დემოკრატიისთვის“, – განაცხადა მან.

internet.ge