პარლამენტის თავმჯდომარის, დავით ბაქრაძის შეფასებით, საქართველოს  თანამშრომლობა ნატოსთან ფოკუსირებულია პრაქტიკულ ამოცანებსა და მექანიზმებზე.

როგორც ნატო-ს გენერალური მდივნის მოადგილე, ალექსანდრე ვერშბოუსთან გამართული შეხვედრის შემდეგ, ბაქრაძემ განაცხადა, შეხვედრაზე დეტალურად ისაუბრეს თუ როგორ უნდა გაგრძელდეს თანამშრომლობა საქართველოსა და ნატოს შორის.

მისი თქმით, პოლიტიკურად ყველაფერი ნათელია, რადგან არსებობს ბუქარესტის ვალდებულება - რომ საქართველო ნატოს წევრი გახდება, რომელიც კიდევ ერთხელ იქნა დადასტურებული ჩიკაგოში.

„ჩვენს ამოცანას წარმოადგენს პრაქტიკული მექანიზმების განხილვა თუ როგორ შეიძლება ამ პოლიტიკური ამოცანის განხორციელება. ამიტომ, ჩვენი თანამშრომლობა ნატოსთან ფოკუსირებულია პრაქტიკულ ამოცანებსა და მექანიზმებზე. ეს არის ის მექანიზმები, რომლის საშუალებითაც ჩიკაგოს სამიტის გადაწყვეტილებებიდან საქართველო ნატოს წევრი გახდება“, – აღნიშნა მან.

სპიკერის ინფორმაციით, შეხვედრაზე ასევე ისაუბრეს ყველა  იმ საკითხზე, რომელიც ნატო-საქართველოს დღის წესრიგში დგას.

„შეხვედრაზე ვისაუბრეთ რეგიონულ უსაფრთხოებასა და ნატო–საქართველოს  კომისიის მუშაობის დღის წესრიგზე. ვფიქრობ, რომ ოპტიმიზმის საფუძველი გვაქვს და პროცესი  პოზიტიურად გაგრძელდება“,  – დასძინა მან.

internet.ge