მოსკოვი ისევ აშშ-დან მომდინარე საფრთხეზე საუბრობს. საქმე ამჯერად ამერიკულ ფულს ეხება, რომელითაც, რუსეთის საგარეო საქმეთა სამინისტროს განცხადებით, შეერთებული შტატები რუსეთში სხვადასხვა ჯგუფებს აფინანსებს.
„დაფინანსების მასშტაბები უკვე შემაშფოთებელია“ - განაცხადა მინისტრის მოადგილემ სერგეი რიაბკოვმა.
„ჩვენ, რუსეთის მხარე რეალურად შეშფოთებულები ვართ, რომ ვაშინგტონის მხრიდან რუსეთში ხდება გარკვეული ჯგუფებისა და მოძრაობების დაფინანსება. რეალურად ამას აქვს ისეთი მასშტაბები, რომ ჩვენი ურთიერთობებისთვის პრობლემად ხდება“ - განაცხადა რიაბკოვმა და დასძინა, რომ ამერიკული მხარე, მართალია, ცდილობს „მოხსნას ჩვენი შეშფოთება, მაგრამ ჩვენი ეჭვები ისევ ძალაშია“ - ამბობს ის.
ჯერ კიდევ გასულ წელს დუმის არჩევნების შემდეგ რუსეთში დაწყებული საპროტესტო აქციების დროს კრემლი მიუთითებდა, რომ საპროტესტო მოძრაობას ამერიკელებს დაქვემდებარებული ოპოზიციონერები მართავდნენ, რომლებიც მითითებებს ვაშინგტონიდან იღებდნენ. მოსკოვმა მტკივნეულად აღიქვა შეერთებული შტატების მიერ რუსეთში მაიკლ მაკფოლის ელჩად დანიშვნაც, რადგან ის „ფერადი რევოლუციების სპეციალისტადაა“ ცნობილი. ეს კი სწორედ ის მიზეზია, რის გამოც კრემლს ამერიკული დაფინანსება „საეჭვოდ და საშიშად“ მიაჩნია.
Internet.ge
