აფხაზეთის ე.წ. საგარეო საქმეთა სამინისტრო „წუხილს“ გამოთვამს იმასთან დაკავშირებით, რომ ეუთოს საპარლამენტო ასამბლეამ საქართველოს შესახებ რეზოლუციას დაუჭირა მხარი, რომელშიც აფხაზეთი და ცხინვალის რეგიონი ოკუპირებულ ტერიტორიებადაა მოხსენიებული - იუწყება „აპსნიპრესი“.

„რეზოლუცია არაობიექტური და ანგაჟირებულია. საპარლამენტო ასამბლეის უპირობო მხარდაჭერა საქართველოს პოზიციის მიმართ ბიძგს აძლევს რეგიონში დაძაბულობის ესკალაციისთვის განკუთვნილ პროვოკაციულ ქმედებებს, რაც აზარალებს ჟენევის მოლაპარაკებათა პროცესს და ქართულ-აფხაზური დარეგულირების პერსპექტივას შორეულს ხდის“ - ნათქვამია განცხადებაში.

სოხუმი ამტკიცებს, რომ არ არის ოკუპირებული, რადგან მისი მოსახლეობა ასეთად არ გრძნობს თავს.

„რეზოლუცია არ ასახავს რეალობას და მხოლოდ ქართული მხარის მონაცემებზეა დაფუძნებული“ - აღნიშნავს ე.წ. საგარეო უწყება.

internet.ge