კახეთში მომხდარი სტიქიის გამო, საქართველოს მთავრობის სხდომა დღეს, თელავში გაიმართება.

ამის შესახებ „ინტერნეტ.ჯი“-ს პრემიერ-მინისტრის აპარატში განუცხადეს. 

მათი ინფორმაციით, თელავში, მთავრობის სხდომა 12:00 საათზე დაიწყება.

დღეს, მთავრობის სხდომა 11:00 საათზე მთავრობის კანცელარიაში უნდა გამართულიყო, მაგრამ კახეთში მოსული სეტყვის გამო, სხდომა გადაიდო. 

შეგახსენებთ, რომ ძლიერმა წვიმამ, სეტყვამ და ქარიშხალმა გვიან ღამით, ქვეყნის რამდენიმე რეგიონი დააზრალა.

სტიქიის შედეგად დაზარალდა - თელავი, გურჯაანი  ლაგოდეხი. განსაკუთრებით მძიმე ვითარება თელავშია, სადაც ძლიერმა ქარმა რამდენიმე სახლს სახურავი გადახადა და მოსახლეობის უმეტესობა ღია ცის ქვეშ არის დარჩენილი. სტიქიის შედეგად, დატბორილია სახლების პირველი სართულები, ხეხილის ბაღები,  ნარგევები, დახოცილია ფრინველი და ცხოველი და რამდენიმე სოფელს ელექტროენერგიაც არ მიეწოდება.

კახეთის დაზარალებულ რეგიონებში წაქცეულია ხეები, რის გამოც, გზები ჩაიკეტა. ამ დროისთვის კი, რეგიონში მობიზილებულია შესაბამისი სამსახურები, იწმინდება გზები  და დაითვლება სტიქიის შედეგად რეგიონისთვის მიყენებული ზარალი.

ამასთან, ძლიერმა სეტყვამ ახალციხე, ასპინძა და ვალეც დააზარალა. გვიან ღამით მოსულმა ნალექმა, რეგიონში საცხორებელი სახლების სახურავები და ავტომობილები დააზარალა. ასევე განადგურებულია ნარგავები. სეტყვის შედეგად ჩაიკეტა ახალციხის მაგისტრალი, რის შედეგადაც გადაადგილება ვერ ხერხდებოდა. ადგილზე,  მთელი ღამის განმავლობაში, სამაშველო სამსახურები მუშაობდნენ. ახალციხის რეგიონთან დაკავშირებით, სპეციალური კომისია შეიქმნება, რომელიც ზარალს დაითვლის.

Internet.ge