აშშ-ის პრეზიდენტობის კანდიდატმა მიტ რომნიმ განაცხადა, რომ ბარაკ ობამამ რუსეთთან „გადატვირთვის“ გამო მოკავშირეებს უღალატა და ქვეყნის უსაფრთხოებაც კითხვის ნიშნის ქვეშ დააყენა.

ამის მაგალითად რომნიმ პოლონეთსა და ჩეხეთში ანტისარაკეტო სისტემების განთავსებაზე აშშ-ის მხრიდან თავის შეკავება დაასახელა.

რესპუბლიკელი პოლიტიკოსის თქმით, აშშ-ის ადმინისტრაციის ჩანაფიქრი, ასეთი გზით მოიგოს რუსეთის გული, იწვევს იმას, რომ თეთრი სახლი დამოკიდებული ხდება რუს ლიდერებზე. ამის დასტურად მან სეულის ისტორია მოიყვანა, როცა ობამასა და მედვედევის საუბარი ჩართული მიკროფონების წყალობით საჯარო გახდა და ამ დროს ობამა მედვედევს სთხოვდა, პუტინს მისთვის დრო მიეცა, რათა არჩევნების შემდეგ უფრო მოქნილი პოლიტიკა ეწარმოებინა.

„ის (პუტინი), ხელისუფლებაში არაპატიოსანი გზით დაბრუნდა, ოვალური კაბინეტიდან კი მას მილოცვებს უგზავნიან. ის მხარს უჭერს დამასკოს სისხლიან რეჟიმს,“ - განაცხადა რომნიმ, რომელიც თვლის, რომ ობამა თმობს ამერიკის, როგორც მსოფლიო ლიდერის როლს.

Internet.ge