კოალიცია „ქართული ოცნების“ ერთ-ერთი წევრი კახა კალაძე აცხადებს, რომ მზად არის, პროკურატურას 6 მილიონი ლარის ხარჯთაღრიცხვა წარუდგინოს.

მისი თქმით, აპირებს საკუთარი ანგარიშების შესახებ ინფორმაცია გამჭვირვალე გახადოს და სამართალდამცავებს დეტალურად აუხსნას, სად და რაში დაიხარჯა თანხა.

„მზად ვართ ვუპასუხოთ სად წავიდა ეს მილიონნახევარი ლარი, მზად ვართ ყველასთვის ხელმისაწვდომი გავხადოთ ეს ინფორმაცია“,- აცხადებს კალაძე.

შეგახსენებთ, რომ კახი კალაძეს, საქართველოს ბანკებში არსებული ყველა ანგარიში დაუყადაღეს. ანგარიშების დაყადაღების ოფიციალური მიზეზად, უკანონო შემოსავლების ლეგალიზაცია სახელდება.

პროკურატურის სპეციალური განცხადების მიხედვით, კახა კალაძის  საბანკო ანგარიშებზე ბოლო პერიოდის განმავლობაში განხორციელდა  დაახლოებით 6 მილიონ აშშ დოლარის ოდენობის თანხის ჩარიცხვა.

„ანგარიშიდან დროის მოკლე მონაკვეთში განხორციელდა საქართველოს კანონმდებლობითა და შესაბამისი საერთაშორისო სტანდარტებით საეჭვო ოპერაციად მიჩნეული განსაკუთრებით დიდი ოდენობით ნაღდი ფულის გადინება. კერძოდ, ბოლო რამდენიმე თვის განმავლობაში კალაძის საბანკო ანგარიშიდან ეტაპობრივად განხორციელდა 1 600 000 ლარამდე თანხის  ნაღდი ფულის სახით გატანა, რომლის შემდგომი მოძრაობა არც ერთ საბანკო დაწესებულებაში არ ფიქსირდება. ამასთან არ არსებობს ზემოთ აღნიშნულ თანხასთან დაკავშირებული რაიმე სახის სამოქალაქო გარიგების დამადასტურებელი დოკუმენტი“,- ნათქვამია გავრცელებულ განცხადებაში.

Internet.ge