ცენტრალური საარჩევნო კომისია პარტიების
რეგისტრაციას განაგრძობს. ამ ეტაპზე განაცხადი 36 პოლიტიკურ პარტიას აქვს შეტანილი,
რომელთაგან 10 უკვე დარეგისტრირდა.
დარეგისტრირების მოთხოვნით, ცესკო-ს დღეს
"ლეიბორისტებმა" მიმართეს. ასევე
ცნობილია, რომ დღესვე „ქრიტიან-დემოკრატებიც“ შეიტანენ განაცხადს.
ცესკოს თავმჯდომარის ზურაბ ხარატიშვილის განცხადებით, იმ საარჩევნო სუბიექტებს, რომლებსაც
საქართველოს პარლამენტში წარმომადგენელი უკვე ჰყავთ, ცესკოში განაცხადის შეტანის
ვადა 5 აგვისტომდე აქვთ. მაჟორიტარი
დეპუტატობის კანდიდატებისა და პარტიული სიების წარდგენის ვადა კი,
პირველ სექტემბრამდეა.
რამდენიმე დღე დარჩათ რეგისტრაციისთვის საინიციატივო ჯგუფებს. დამოუკიდებელი
მაჟორიტარების წარდგენის ვადა მათ 5 აგვისტოს ეწურებათ. საინიციატივო ჯგუფი 5
კაცისაგან უნდა იყოს დაკომპლექტებული.
განაცხადის შეტანის შემდეგ დამოუკიდებელი მაჟორიტარი კანდიდატების დარეგისტრირება
დაიწყება. პროცედურა 6 აგვისტოდან 12 აგვისტომდე გაგრძელდება. რეგისტრაციისთვის
მაჟორიტარობის კანდიდატმა საოლქო საარჩევნო კომისიაში ნარკოლოგიური ცნობა და
ამომრჩეველთა სია უნდა წარადგინოს.
ასევე, რამდენიმე დღეში ადგილობრივმა თვითმმართველობებმა სააგიტაციო მასალების
განთავსების რეგულირება უნდა დაიწყონ. რაიონულმა მუნიციპალიტეტებმა, საკრებულოებმა
და გამგეობებმა 11 აგვისტომდე უნდა გამოაქვეყნონ იმ შენობა-ნაგებობების სია, სადაც
სააგიტაციო მასალების გამოქვეყნება აიკრძალება.
შეგახსენებთ,
რომ პრეზიდენტის
გადაწყვეტილებით 2012 წლის 1 ოქტომბერს საპარლამენტო არჩევნები ჩატარდება.
Internet.ge
