„ადამიანებს მოკლე მეხსიერება აქვთ“ - ასეთი პასუხი გასცა ცხინვალში ჩასულმა დიმიტრი მედვედევმა მის მიმართ გამოთქმულ ბრალდებებს იმის შესახებ, რომ 2008 წლის აგვისტოში ის ყოყმანობდა და ვერ ახერხებდა საბრძოლო მოქმედებების დაწყების შესახებ გადაწყვეტილების მიღებას, რამაც მსხვერპლის რაოდენობა კიდევ უფრო გაზარდა.

ეს ბრალდება მაშინდელ მთავარსარდალს გენშტაბის ყოფილმა უფროსმა იური ბალუევსკიმ დოკუმენტურ ფილმში „დაკარგული დღე“ წაუყენა, თუმცა მედვედევის როლი აღნიშნული გადაწყვეტილების მიღებაში ვლადიმერ პუტინმაც საეჭვო გახადა, როცა განაცხადა, რომ ის პეკინიდან ურეკავდა პრეზიდენტსა და თავდაცვის მინისტრს, როცა გადაწყვეტილების მიღება ხდებოდა.

პუტინსაც და ბალუევსკისაც მედვედევმა ცხინვალიდან უპასუხა:

„მე ჩემი გადაწყვეტილება მივიღე 2,5 საათის შემდეგ, რაც ქართულმა მხარემ საომარი მოქმედებები დაიწყო. ეს დილის 4 საათი იყო. მან კი, ვინც სხვა რამეს ამბობს, ან არ იცის, ან შეგნებულად ამახინჯებს,“ - თქვა მედვედევმა.

„ამ ტიპის გადაწყვეტილებას იღებს მხოლოდ ერთი ადამიანი - უმაღლესი მთავარსარდალი და ასეთი ადამიანი იმ მომენტში ვიყავი მე. არანაირი სხვა კონსულტაციები არ შეიძლება რომ ყოფილიყო და არც ყოფილა. ვლადიმერ პუტინს მე დავუკავშირდი მხოლოდ 8 აგვისტოს,“ - დააზუსტა მან.

მისი თმით, „ყველა გადაწყვეტილება (სამხედრო ოპერაციის დაწყება) ზუსტად იმ მომენტში იყო მიღებული, როცა ამის გაკეთება იყო საჭირო, რადგან საუბარი იყო საქართველოს ტერიტორიულ მთლიანობაზე და გადაწყვეტილება უნდა მიღებულიყო მხოლოდ იმ შემთხვევაში, თუ პირდაპირი აგრესია დაიწყებოდა რუსეთის მოქალაქეებისა და რუსი სამშვიდობოების წინააღმდეგ“.

იხ. ბმული

internet.ge