კოალიცია "ქართული ოცნების" საგარეჯოს მაჟორიტარი დეპუტატობის კანდიდატი თინათინ ხიდაშელი სოფელ იორმუღანლს, ოლამბალოს და კაზლარის მოსახლეობას შეხვდა.

ხიდაშელის პრესსამსახურის ინფორმაციით, კანდიდატი ადგილობრივებს სოფლის პრობლემებზე ესაუბრა და მისი გამარჯვების შემდეგ ამ პრობლემების უმალვე მოგვარებას დაჰპირდა.

თინათინ ხიდაშელის განცხადებით, სოფელს 21-ე საუკუნეში არ აქვს წყალი. სასმელი და საყოფაცხოვრებო მოხმარებისთვის საჭირო წყლის მოსატანად გადიან კილომეტრიან გზას, სოფელ კაზლარში.

„სოფელს არ აქვს სკოლა. 400 კომლიანი სოფლისთვის სკოლის შენობაში სულ 3 საკლასო ოთახია გამოყოფილი, სადაც ანტისანიტარიაა და ამ დროისთვის შინაური ფრინველების სადგომად გამოიყენება. ბავშვებისთვის გაკვეთილები  კი მასწავლებლის სახლში ტარდება“,- განაცხადა ხიდაშელმა.

მისი თქმით,  მიუხედავად უამრავი პრობლემისა, რომელიც სოფლად აწუხებთ მთავარ პრობლემად რჩება მიწები, რომლებიც მარტის თვეში გაიყიდა და მოსახლეობა სახნავ-სათესის და საძოვრების გარეშე დატოვეს. აღნიშნულ სოფლებში კი მოსახლეობა ძირითადად მეცხოველეობით ირჩენს თავს.

ხიდაშელი აცხადებს, რომ სოფლის მოსახლეობას გაუყიდეს საძოვრები და იძულებულს ხდიან საქონელი გაყიდონ.

თინათინ ხიდაშელი შეხვედრაზე მოსახლეობას დაჰპირდა, რომ მისი გამარჯვების შემდეგ პირველ რიგში დაუბრუნდებათ უკანონოდ წართმეული მიწები და კოალიციის საარჩევნო პროგრამაში დეტალურად გაწერილი სოფლის გეგმა მათ რეალურ შეღავათს აგრძნობინებს.

Internet.ge