საქართველოს პრეზიდენტი 150 საუკეთესო აბიტურიენტს ბათუმში
შეხვდა და წარმატება მიულოცა.
‘’თქვენ ხართ ჩვენი სიამაყე, თქვენ ხართ ის ადამიანები,
ვისთვისაც შენდება საქართველო. ჩემთვის გაჭირვების გადალახვის მთავარი გზა არის ძალიან
დიდი შრომა და სწავლა. მე ასე მზრდიდნენ და ასე ვზრდი მეც ჩემს შვილებს," - განაცხადა
პრეზიდენტმა.
მიხეილ სააკაშვილმა საატესტატო გამოცდების წინ, გამოცდების
ეროვნულ ცენტრში განვითარებული მოვლენებიც გაიხსენა.
‘’თქვენ იცით, რომ გამოცდებზე წელს ვიღაცეებს გარკვეული
შიშები ჰქონდათ, ეროვნული გამოცდების წინ პოლიტიკური ხელის ფათური მოგვიწყვეს განათლების
სისტემაში, ვიღაცეები წავიდნენ სამსახურიდან... ჩვენს მიერ შექმნილი სისტემიდან ბევრი
წასულა, მაგრამ სისტემა არ მოშლილა, ზოგჯერ უკეთესიც კი მიგვიღია, იგი წავა და სხვა
მოვა... მჯობნის მჯობნი არ დაილევა", - განაცხადა მიხეილ სააკაშვილმა.
პრეზიდენტმა ასევე განაცხადა, რომ ადრე საქართველოში,
უნივერსიტეტში იურიდიულ ფაკულტეტზე ჩარიცხვა 15 000 ღირდა და სწორედ ის ხალხი,
რომლებიც მაშინ კორუფციაში იყვნენ ჩართულნი, დღეს ხელისუფლებაში დაბრუნებას ცდილობენ,
თუმცა ამას ვერ მოახერხებენ.
პრეზიდენტმა წარმატებები უსურვა სტუდენტებს და დაპირდა,
რომ კარგი ქვეყნის მოქალაქეები იქნებიან. მაშინ, როცა ისინი უნივერსიტეტს დაამთავრებენ
საქართველო მდიდარი, წელში გამართული ქვეყანა იქნება.
internet.ge
