თბილისის საქალაქო სასამართლოს ადმინისტრაციულ საქმეთა კოლეგიის  2012 წლის 10 სექტემბრის გადაწყვეტილებით, ნაწილობრივ დაკმაყოფილდა მოსარჩელე შპს ”ლ.გ. ჯგუფის” სარჩელი მოპასუხეების საქართველოს ფინანსთა სამინისტროსა და შემოსავლების სამსახურის მიმართ. მოსარჩელე ადმინისტრაციულ-სამართლებრივი აქტების ბათილად ცნობას მოითხოვდა.

თბილისის საქალაქო სასამართლოს ინფორმაციით, მოსარჩელემ განმარტა, რომ მათ კომპანიას საქართველოს ფინანსთა სამინისტროს შემოსავლების სამსახურის აუდიტის დეპარტამენტის 2011 წლის 21 ოქტომბრის ბრძანებისა და ამავე წლის 24 ოქტომბრის საგადასახადო მოთხოვნის თანახმად, დაეკისრა დამატებითი ღირებულების გადასახადი - 11811, 31 ლარი.

აღნიშნული მოსარჩელემ გაასაჩივრა შემოსავლების სამსახურში, თუმცა საჩივარი არ დაკმაყოფილდა. შესაბამისი საჩივრით  მოსარჩელემ ფინანსთა სამინისტროსთან არსებული დავების განხილვის საბჭოს მიმართა, რომელმაც 2012 წლის 30 აპრილის გადაწყვეტილებით, ნაწილობრივ, კერძოდ, კი ჯარიმის თანხის დაკისრების ნაწილში დააკმაყოფილა საჩივარი. მოსარჩელე არ დაეთანხმა საჩივრის ნაწილობრივ დაკმაყოფილებას და მიმართა სასამართლოს.

მოპასუხეები არ დაეთანხმნენ მოსარჩელის სასარჩელო მოთხოვნას და განმარტეს, რომ  სარჩელი უსაფუძვლოა და არ უნდა დაკმაყოფილდეს.

სასამართლომ მიიჩნია, რომ საკითხი იმის შესახებ, ჩაიდინა თუ არა შპს "ლ.გ. ჯგუფმა" საქართველოს საგადასახადო კოდექსის 275-ე მუხლით გათვალისწინებული საგადასახადო სამართალდარღვევა, კერძოდ, შეამცირა თუ არა მან 2010 წლის მარტის თვის დღგ-ს დეკლარაციის წარდგენისას სახელმწიფო ბიუჯეტში გადასახდელი დღგ-ს თანხები, მოპასუხე მხარეს არ აქვს სრულყოფილად გამოკვლეული და შესწავლილი, შესაბამისად, მოპასუხის მიერ შპს "ლ.გ. ჯგუფისთვის" 7 207,54 ლარის დღგ-ს ჩათვლის გაუქმება და მისთვის სახელმწიფო ბუჯეტის სასარგებლოდ დღგ-ს ძირითადი თანხის - 7 207,54 ლარის გადასახდელად დაკისრება, უკანონოა.     

internet.ge