ხელისუფლება მხარს დაუჭერს შეთანხმებას, ნებისმიერ საკაბელო მაუწყებელსა და ტელევიზიას შორის იმის თაობაზე, რომ მათი თანამშრომლობა MUST CARRY–ის პრინციპით გაგრძელდეს.

ამის შესახებ ჟურნალისტებს არასამთავრობოების მოთხოვნასთან დაკავშირებით, პარლამენტის თავმჯდომარე დავით ბაქრაძემ განუცხადა.

მისი თქმით, MUST CARRY–ის  საკანონმდებლო დასრულება იმას არ ნიშნავს, რომ ასეთი თანამშრომლობა შეწყდება.

„იმედი მაქვს, რომ კაბელები და ტელევიზიები კომერციულად, ორმხრივად მისაღებ მოდელზე შეთანხმებას შეძლებენ, რომლის საფუძველზე, ისინი გრძერლვადიან პერსპექტივაში თანამშრომლობას გააგრძელებენ.  ე.წ. MUST CARRY-ის შეთანხმება საკაბელო მაუწყებელს და კომერციულ არხს შორის კომერციული შეთანხმებაა და ჩვენ არ შეგვიძლია მუდმივად დავავალდებულოთ საკაბელო მაუწყებლები, რომ საკუთარი კომერციული ინტერესის ხარჯზე,  სატელევიზიო არხები გადასცენ. გამონაკლისის სახით ამის გაკეთება, საარჩევნო პერიოდში შეგვიძლია. MUST CARRY-ის დასრულება იმას არ ნიშნავს, რომ კაბელებმა და ტელევიზიებმა თანამშრომლობა უნდა შეწყვიტონ. მათ შეუძლიათ თანამშრომლობა გააგრძელონ“, – განაცხადა ბაქრაძემ.

შეგახსენებთ, რომ არასამთავრობოები ითხოვენ, რომ MUST CARRY–ის  პრინციპი არჩევნების შემდგომ პერიოდშიც გაგრძელდეს.

Internet.ge