საქართველოს ეროვნულ ბანკს, გატარებული რეფორმებისა და ინოვაციური სისტემების გაცნობის მიზნით, ავღანეთის ცენტრალური ბანკის წარმომადგენლები ესტუმრნენ.

სტუმრებმა ქართველი კოლეგებისგან საგადახდო და ფასიანი ქაღალდების სისტემის დანერგვის შესახებ მიიღეს ინფორმაცია.

„ეს უკვე მესამე უცხოური ცენტრალური ბანკია, რომელიც, საქართველოს ეროვნულ ბანკს, როგორც წარმატებულ მაგალითს, მსოფლიო ბანკის რეკომენდაციით ეწვია. მანამდე საქართველოს ეროვნულმა ბანკმა, პაპუა ახალი გვინეისა და ეთიოპიის ცენტრალურ ბანკებს უმასპინძლა. მათი ვიზიტიც ასევე მსოფლიო ბანკის რეკომენდაციით განხორციელდა“,- განაცხადეს ეროვნულ ბანკში.

საქართველო ერთ-ერთი პირველი ქვეყანაა, სადაც ამერიკული კომპანია „მონტრანის“ მიერ შემუშავებული ახალი თაობის საგადახდო და ფასიანი ქაღალდების ჰიბრიდული სისტემა წარმატებით დაინერგა.

„საქართველოს ეროვნული ბანკი უკვე იმ ინსტიტუტების სიაშია, რომლებსაც მსოფლიო ბანკი წარმატებულ მაგალითად ასახელებს ინოვაციური და პროგრესული პროექტების განხორციელების თვალსაზრისით. ავღანელი კოლეგები სწორედ მსოფლიო ბანკის რჩევით ეწვივნენ ეროვნულ ბანკს, რათა ადგილზე გაეცნონ იმ რეფორმებსა და სისტემებს, რომელიც ჩვენ ბოლო პერიოდში დავნერგეთ - ეს არის ანგარიშსწორების მაღალტექნოლოგიური სისტემები, რომელიც საშუალებას აძლევს ფინანსურ ინსტიტუტებს გადარიცხვები სწრაფად და უსაფრთხოდ განახორციელონ“, - განაცხადა ეროვნული ბანკის აღმასრულებელმა დირექტორმა გიორგი მელაშვილმა, შეხვედრის დასრულების შემდეგ.

სტუმრები  ეროვნული ბანკის შესაბამისი დეპარტამენტის წარმომადგენლებს შეხვდნენ და სისტემის  სხვადასხვა კომპონენტების დემონსტრირებას დაესწრნენ.

„ავღანეთის ცენტრალური ბანკის სახელით მინდა მადლობა გადავუხადო საქართველოს ეროვნულ ბანკს იმისათვის, რომ მოგვეცა შანსი გავცნობოდით გადახდის ახალ სისტემას, რომელიც საქართველოს ეროვნულმა ბანკმა დანერგა. ჩვენ, ავღანეთის ცენტრალური ბანკის ორი წარმომადგენელი, მსოფლიო ბანკის დახმარებით და რეკომენდაციით, ვესტუმრეთ საქართველოს ეროვნულ ბანკს და გავეცანით რეალურ დროში ანგარიშსწორების სისტემას (RTGS). მსოფლიო ბანკი ავღანეთში ახორციელებს ორ პროექტს, რომლებიც გააძლიერებს ავღანეთის ცენტრალურ ბანკს და ზოგადად ავღანეთის ფინანსურ სექტორს, საქართველოს ეროვნულმა ბანკმა გაგვიზიარა თავისი გამოცდილება ამ საკითხში, ბოლო ორი დღის განმავლობაში ვესტუმრეთ სხვადასხვა დეპარტამენტებს და დეტალურად გავეცანით ახალ სისტემას“, - განაცხადა ავღანეთის ცენტრალური ბანკის ფინანსური სექტორის განვითარების პროექტის გენერალურმა დირექტორმა ზალმეი შერზადიმ. 

Internet.ge