აშშ-სა და ისრაელის დროშები დაწვეს დემონსტრანტებმა ლონდონში, ამერიკის საელჩოსთან.

აქციაში 200-მდე ადამიანი მონაწილეობდა, რომლებიც ანტიამერიკულ ლოზუნგებს ყვიროდნენ.

მათ ხელმძღვანელობდა თავისი ანტიდასავლური რიტორიკით ცნობილი ანჯეი ჩუდარი, რომელიც ექსტრემისტული ჯგუფის - „მუსულმანები ჯვაროსნული ლაშქრობების წინააღმდეგ“ ოფიციალურ წარმომადგენლად ითვლება.

დემონსტრანტთა ტრანსპარანტებზე იყო წარწერები: „ამერიკა - ისლამისა და მუსულმანების მტერი“, „ძირს აშშ“, „დაიწვი აშშ“, „ბარაკ ობამა პასუხს აგებს“. ზოგიერთები კი აშშ-სა და დიდ ბრიტანეთში შარიათის შემოღებისკენ მოუწოდებდნენ.

აქციის მონაწილეებმა განუცხადეს ჟურნალისტებს, რომ აპროტესტებენ აშშ-ში გადაღებულ ფილმს „მუსულმანთა უცოდველობას“ და ამასთან, მათი გამოსვლა მშვიდობიანია.

აქციის ადგილზე პოლიცია იყო მობილიზებული. დაუზუსტებელი ინფორმაციით მათ ორი ადამიანი დააკავეს.

რაიმე სახის ძალადობა აქციაზე არ დაფიქსირებულა.