დღეს, საქართველოს სპორტისა და ახალგაზრდობის საქმეთა სამინისტროში 30-მდე სპორტული ფედერაციის წარმომადგენლები, ვეტერანი და მოქმედი სპორტსმენები შეიკრიბნენ.

შეხვედრაზე სპორტისა და ახალგაზრდობის საქმეთა მინისტრთან ერთად, სრულიად საქართველოს სპორტული საზოგადოების სახელით გაკეთდა შემდეგი განცხადება:

"საქართველოში ბოლო პერიოდში განვითარებული მოვლენების ფონზე ქართული სპორტული საზოგადოება თავს ვალდებულად მიიჩნევს განაცხადოს, რომ ყოვლად დაუშვებელია ადამიანის უფლებათა ნებისმიერი ფორმით შელახვა, პიროვნების შეურაცხყოფა, მითუმეტეს პატიმართა წამება და დამცირება.

ჩვენ თანადგომას ვუცხადებთ წამების თითოეულ მსხვერპლს და მათ ოჯახებს.

საქართველოს სპორტული საზოგადოება მოითხოვს, რომ გამოვლენილ ფაქტებთან დაკავშირებით ჩატარდეს გამოძიება და დაისაჯოს ყველა დამნაშავე.

შექმნილ რეალობაში, ასევე მიუღებლად მიგვაჩნია და ვეწინააღმდეგებით ნებისმიერი პოლიტიკური გაერთიანების მხრიდან პენიტენციალურ სისტემაში გამოვლენილი დარღვევების პოლიტიკური მიზნით გამოყენებას."

Internet.ge