სასჯელაღსრულების, პრობაციისა და იურიდიული დახმარების საქმეთა სამინისტრო სახალხო დამცველის აპარატის განცხადებას ეხმიანება, სადაც აღნიშნულია, რომ „ქსნის დაწესებულების ე.წ. „ძველ ზონაში“ განთავსებულმა მსჯავრდებულებმა სახალხო დამცველის სახელზე დაწერეს კოლექტიური ახსნა-განმარტება, რომელსაც ხელს აწერს 526 მსჯავრდებული.

ახსნა -განმარტება შეეხება მსჯავრდებულთა მიმართ ქსნის N15 დაწესებულების ადმინისტრაციის და თანამშრომლების მხრიდან  წარსულში განხორციელებულ არასათანადო, არაადამიანურ და დამამცირებელ მოპყრობას.“ განცხადებაში ასევე დასახელებულნი არიან დაწესებულების ის თანამშრომლები, რომლებიც, პატიმართა გადმოცემით, მათ მიმართ ცემასა და სხვა სახის არასათანადო მოპყრობას ახორცილებდნენ.

სამინისტროში აცხადებენ, რომ 2012 წლის 20 სექტემბრის შემდეგ, სასჯელაღსრულების დაწესებულებებში წამების, არაადამიანური და ღირსების შემლახავი მოპყრობის არც ერთი ფაქტი აღარ დაფიქსირებულა.

„სასჯელაღსრულების, პრობაციისა და იურიდიული დახმარების საკითხთა სამინისტრო განსაკუთრებული ყურადღებით ეკიდება წამების, არაადამიანური და ღირსების შემლახავი მოპყრობის ფაქტების შესახებ მიღებულ ნებისმიერ ინფორმაციას, რომელიც მოგვეწოდება როგორც უშუალოდ პატიმართა, ასევე სასჯელაღსრულების დაწესებულებებში მონიტორინგის უფლების მქონე პირებისა და ორგანიზაციების მიერ. მიღებული ინფორმაციის შემდეგ ინდივიდუალურად ხდება ყველა კონკრეტული ფაქტის გადამოწმება და შესაბამისი გადაწყვეტილების მიღება. აღსანიშნავია, რომ სახალხო დამცველის აპარატის მიერ განცხადებაში აღნიშნული დაწესებულების თანამშრომლები განცხადების გავრცელების მომენტისათვის სასჯელაღსრულების დეპარტამენტის მიერ უკვე იდენტიფიცირებული და სამსახურიდან გათავისუფლებული იყვნენ“,- ნათქვამია გავრცელებულ განცხადებაში.

internet.ge