საქართველოს სროლის ფედერაციის პრეზიდენტი, გიორგი უდესიანი, ტელეკომპანია ‘’მაესტროში" გაჟღერებულ დაუსაბუთებელ ბრალდებას ეხმაურება. გიორგი უდესიანის განცხადებას ‘’ინტერნეტ.ჯი" უცვლელად გთავაზობთ:

‘’ბოლო ერთი წლის განმავლობაში, გარკვეული მედიასაშუალებების მიერ ჩემს წინააღმდეგ მიმდინარეობს დაუსაბუთებელი ბრალდებებითა და ცილისწამებებით აღსავსე პიარ-კამპანია, რასაც შეგნებულად არ ვეხმაურებოდი, რადგან მიმაჩნდა, რომ ისედაც დაძაბულ სიტუაციაში საფუძველს მოკლებული, დაკვეთილი სიუჟეტების წინააღმდეგ რეაგირება არ ღირდა.

მაგრამ უკანასკნელ დღეებში, ქვეყანაში ახალი პოლიტიკური ვითარების ფონზე ჩემი და ჩემი ოჯახის წევრების წინააღმდეგ გუშინდელმა, 5 ოქტომბერის ტელეკომპანია მაესტროს 9 საათიანი საინფორმაციო გამოშვების სიუჟეტმა ყოველგვარ ზღვარს გადააჭარბა. ცალმხრივად შეთხზულმა ბრალდებამ, რომელშიც ინკოგნიტოდ მყოფმა ადამიანმა მორიგი დაკვეთა შეასრულა. ჟურნალისტს კი არანაირი სურვილი და მცდელობა არ ქონია დამკავშირებოდა.

მთელი პასუხისმგებლობით ვაცხადებ,  რომ ჩემი - გიორგი უდესიანის ინტერესებში არასოდეს ყოფილა და არც მომავალში იქნება საქართველოში დესტაბილიზაციის, ან რაიმე ტიპის ქაოსისა და არეულობის ინტერესი. მე ყოველთვის ვიდექი რიგით ჯარისკაცად იქ, სადაც ჩემს ქვეყანას სჭირდებოდა. ვამაყობ, რომ 1990-იანი წლებიდან, აფხაზეთის ომიდან მოყოლებული, 2008 წლის რუსეთ-საქართველოს ომის დროს, ჩემს თანამებრძოლებთან ერთად, ქვეყნის ტერიტორიულ მთლიანობას ვიცავდი. ამჟამად ვიმყოფები საზღვარგარეთ და უახლოეს მომავალში ყველა კითხვას თამამად გავცემ პასუხს.

მიმაჩნია, რომ თავისუფალი მედია ყოველთვის უნდა იდგეს ადამიანის უფლებების დაცვის სადარაჯოზე, არ უნდა არღვევდეს ადამიანის უდანაშაულობის პრეზუმფციას და არ უნდა ასრულებდეს კერძო ადამიანების ბინძურ დაკვეთებს.

იმედი მაქვს, რომ შეჩერდება ეს ყოველგვარ ზღვარს გადასული, ადამიანის ღირსების შემლახველი კამპანია და საჭირო არ გახდება მივმართო ადამიანის უფლებების დამცველ საერთაშორისო ორგანიზაციებს."

internet.ge