აზიის განვითარების ბანკი (ADB) ქობულეთის შემოვლითი გზის მშენებლობას დააფინანსებს, პროექტისთვის, 140 მლნ აშშ დოლარი  გამოიყო.

შესაბამის ხელშეკრულებას აზიის განვითარების ბანკის ვიცე-პრეზიდენტმა ქსიაო ჟაომ და საქართველოს მხრიდან ფინანსთა მინისტრმა - დიმიტრი გვინდაძემ მოაწრეს ხელი. ხელმოწერის ცერემონიას რეგიონული განვითარებისა და ინფრასტრუქტურის მინისტრი, რამაზ ნიკოლაიშვილიც დაესწრო.

პროექტის ფარგლებში ADB-ის მხრიდან 119 მლნ აშშ დოლარის ოდენობის ფინანსური რესურსი უკვე გამოყოფილია. აღნიშნული გზის მშენებლობას კოორდინაციას საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი უწევს.

აღნიშნულ მონაკვეთზე დაიგება ასფალტ-ბეტონის საფარი. აშენდება რკინიგზის გადამკვეთი ესტაკადა, სატრანსპორტო კვანძები და ხიდები, მოეწყობა ხელოვნური ნაგებობები, საყრდენი კედლები, სანიაღვრე სისტემები და შესაბამისი ინფრასტრუქტურა. ქობულეთის შემოვლითი გზა ოზურგეთის რაიონის სოფელ ნატანების სიახლოვეს იწყება, 20-მდე სოფელს გაივლის და მახინჯაურში დასრულდება. ქობულეთის 12,4 კმ-იანი შემოვლითი გზის მშენებლობასთან ერთად, პროექტი ჩაქვი-მახინჯაურის გზის გაუმჯობესებასაც ითვალისწინებს. ამჟამად პროექტზე სამშენებლო სამუშაოები ინტენსიურად მიმდინარეობს.

პროექტზე პირდაპირ და ირიბად 1000-მდე ადამიანია დასაქმებული.

internet.ge