საქართველოს პრემიერ-მინისტრი აშშ-ში ოფიციალურ შეხვედრებს მართავს. გილაურთან ერთად, საერთაშორისო სავალუტო ფონდის საგაზაფხულო სესიებში მონაწილეობს დიმიტრი გვინდაძეც.

საქმიანი შეხვედრები უკვე გაიმართა ამერიკის შეერთებული შტატების ეკონომიკური და საფინანსო უწყებების წარმომადგენლებთან.

ნიკა გილაური  ”ათასწლეულის გამოწვევის” კორპორაციის წარმომადგენლებსაც შეხვდა.

შეხვედრაზე საქართველოსთვის ახალი კომპაქტის გამოყოფაზე ისაუბრეს. თანხა ერთდროულად რამდენიმე მსხვილ პროექტს მოხმარდება.

“ჩვენ ახალი პროგრამა გვაქვს, განიხილება 100-150 მილიონ დოლარიანი ახალი კომპაქტი, რაც განათლების სექტორში ინვესტიციის ჩადებას ნიშნავს. თანხის ნაწილი სკოლების რეაბილიტაციას მოხმარდება, ნაწილი კი ახალი ამერიკული უნივერსიტეტის მშენებლობას მოხმარდება. ამ უნივერსიტეტში სტუდენტებს საშაულება ექნებათ მიიღონ ამერიკული განათლება და აიღონ შესაბამისი დიპლომიც“,- განაცხადა პრემიერმა.

მისი თქმით, 2 მაისს უნდა გაიმართოს შესაბამისი „ბორდი“ და აღნიშნული პროექტების დამტკიცება სწორედ ამ შეხვედრისას მოხდება.

პარალელურ რეჟიმში, ქართული დელეგაცია შეხვედრებს მართავს ლათინური ამერიკის ქვეყნების ფინანსთა უწყებების წარმომადგენლებთან.

შეხვედრების დროს, ორმხრივი თანამშრომლობისა და ეკონომიკური ურთიერთობების გაღრმავების გარდა, ერთ-ერთი მთავარი განსახილველი თემა ქართული რეფორმები და უკვე მიღებული გამოცდილებაა.

ცნობილია, რომ გილაური დღეს საღამოს საერთაშორისო სავალუტო ფონდის მმართველ დირექტორსაც შეხვდება.

Internet.ge