თბილისის მერი გიგი უგულავა მოადგილეებს, საქალაქო სამსახურებისა და ისან-სამგორის მუნიციპალიტეტის ხელმძღვანელებს შეხვდა. საგანგებო თათბირზე სტიქიის შედეგებზე იმსჯელეს.

დედაქალაქში უკვე ყველა გზა გახსნილია. ცენტრალურ მაგისტრალებზე ტრანსპორტი შეუზღუდავად გადაადგილდება. 

სტიქიის პირველივე წუთებიდან დაწყებულ სამუშაოებს მერიის სპეციალური სამსახურები ისევ უწყვეტ რეჟიმში განაგრძობენ. ახლა გზების გაწმენდა, აღგენა, ასფალტის საფარის დაგება და სანიაღვრე არხების გასუფთავება მიმდინარეობს. 

ყველაზე რთული ვითარება იყო ორთაჭალაში, გულუას მოედანზე, სადაც გზის გახსნა რამდენიმე საათის წინ მოხერხდა. ადგილზე მობილიზებული იყო ყველა შესაბამისი სამსახური. მთელი ღამის განმავლობაში დატბორილი სახლებიდან წყალს ტუმბავდნენ. მოედნის მიმდებარე ქუჩების მაცხოვრებლები სახლებში შესვლას, სავარაუდოდ, დღის ბოლომდე შეძლებენ. 

მერიის ყველა შესაბამისი სამსახური საგანგებო რეჟიმზეა გადასული. სტიქიის შემდეგ თბილისის ქუჩებში მოძრაობა თავისუფალია. ამ დროისთვის სამუშაოები გრძელდება გულუას ქუჩაზე და მუხიანის აგარაკებზე, სადაც მოვარდნილი ღვარცოფის შედეგად ჩახერგილი გზა უკვე გახსნილია. 

აღწერილია ყველა დაზიანებული შენობა. დაზარალებულებს დროებითი საცხოვრებლით მერია უზრუნველყოფს. ასევე, შექმნილია სპეციალური კომისია, რომელიც ზარალის ოდენობას დაადგენს. 

თბილისში ვერცხლის ქუჩაზე კულტურული მემკვიდრეობის დაცვის სააგენტოს სპეციალისტები მუშაობენ. აქ ეკლესია ჩამოინგრა. მსხვერპლი არ არის. 

დაზარალებული მოსახლეობის დასახმარებლად, მერიაში ცხელი ხაზია გახსნილი. იმ ადამიანებმა, ვისაც დახმარება სჭირდება, უნდა დარეკონ ნომერზე - 2-72-22-22, ასევე, ცხელი ხაზის ოპერატორებს უნდა დაუკავშირდნენ ის პირებიც, ვისაც დაზარალებულების დახმარება უნდა.

Internet.ge