იტალიაში, 16 თვის ბავშვს, მსოფლიოში ყველაზე პატარა ხელოვნური გული გადაუნერგეს. სწორედ მისი საშუალებით მოახერხეს ექიმებმა ბავშის სიცოცხლის შენარჩუნება დონორის გულის გადანერგვამდე.

უნიკალური ოპერაცია რომის პედიატრიულ კლინიკაში ორი თვის წინ ჩატარდა, თუმცა ექიმებმა მის შესახებ მხოლოდ ახლა განაცხადეს.

„ოპერაცია იმდენად რთული იყო, რომ მხოლოდ ახლა - როცა ბავშვის სიცოცხლეს საფრთხე აღარ ემუქრება და მას დონორის გული აქვს გადანერგილი, - შეგვიძლია ვისაუბროთ ამ გამოცდილების შესახებ,“ - განმარტა ქირურგთა გუნდის მეთაურმა, პროფესორმა ანტონიო ამედეომ.

მისი თქმით, ხელოვნურ აპარატს შეუძლია წუთში 1,5 ლიტრი სისხლის გატარება. მისი სიგრძე 5 სმ-ია, სიგანე - 1 სმ, ხოლო წონა 11 გრამია. ხელოვნური გული ამერიკაშია წარმოებული და ჯერ კიდევ კლინიკურ გამოცდას გადის. ბავშვს ეს აპარატი 13 დღის განმავლობაში ედგა.  იტალიელი პროფესორი მიიჩნევს, რომ ეს ახალი რეკორდია ბავშვთა ტრანსპლატაციის სფეროში.

internet.ge