აშშ-ის კონგრესში მზადდება რეზოლუცია, რომელიც უკრაინის პრეზიდენტისა და სხვა ჩინოვნიკების წინააღმდეგ სანქციების დაწესებას გულისხმობს.

სენატორ ჯეიმ ინჰოფის პროექტი განსახილველად სენატის საგარეო კომიტეტშია წარდგენილი.

მისი ინიციატორები მოუწოდებენ ვიქტორ იანუკოვიჩს, სამედიცინო დასკვნების საფუძველზე, იულია ტიმოშენკო სასწრაფოდ გაათავისუფლოს პატიმრობიდან.

რეზოლუციის ავტორი, ასევე, მოუწოდებს კონგრესს, გაკიცხოს უკრაინის პრეზიდენტის ადმინისტრაცია ექს-პრემიერის პოლიტიკური მოტივით დაპატიმრების გამო.

აშშ-ის სახელმწიფო დეპარტამენტს სთხოვენ პრეზიდენტ იანუკოვიჩს, უკრაინის გენპროკურორს პშონკას და კიდევ რამდენიმე ჩინოვნიკს, რომლებსაც კავშირი აქვთ ტიმოშენკოს დაპატიმრებასთან, აშშ-ის ტერიტორიაზე შესვლა აუკრძალონ.

და ბოლოს, რეზოლუციაში წერია, რომ სახელმწიფო დეპარტამენტმა იულია ტიმოშენკოს გათავისუფლებამდე ამერიკის ელჩი უკრაინაში უკან გაიწვიოს. ასევე, პროექტი სთავაზობს ნატოს, შეაჩეროს ყველა შეთანხმება უკრაინასთან და „განსაკუთრებულ პარტნიორობასთან დაკავშირებით“ კიევს გამოსაცდელი ვადა მისცეს, - იმ დრომდე, ვიდრე ტიმოშენკოს არ გაათავისუფლებენ.

internet.ge