გამოცდების ეროვნული ცენტრის თანამშრომლებმა, რამდენიმე წუთის წინ, ცენტრის მიმდებარე ტერიტორიაზე პრეს-კონფერენცია გამართეს, სადაც სამსახურის დატოვების შესახებ განაცხადეს.

თანამშრომელთა თქმით, მათთვის კატეგორიულად მიუღებელია გამოცდების ეროვნული ცენტრის დირექტორის, მაია მიმინოშვილის, სამსახურიდან გათავისუფლება. განსაკუთრებით, ისინი პროტესტს გამოთქვამენ აღნიშნული ფაქტის მიზეზების ბუნდოვანების გამო.

„ხაზგასმით უნდა ითქვას, რომ გამოცდების ეროვნული ცენტრის თანამშრომლებისა და მინისტრის გუშინდელ შეხვედრაზე დიმიტრი შაშკინმა ვერ მოიყვანა ვერც ერთი არგუმენტი იმის სადემონსტრაციოდ, თუ კონკრეტულად რაში გამოიხატება მინისტრისა და მაია მიმინოშვილის „შეუთავსებლობა“, - განაცხადა ერთ-ერთმა თანამშრომელმა კახა ჯამბურიამ, გამოცდების ეროვნულ ცენტრში ყველა მნიშვნელოვანი გადაწყვეტილება ხელმძღვანელობასა და თანამშრომლებს შორის შეთანხმების საფუძველზე მიიღება. შესაბამისად, ბატონ მინისტრს სინამდვილეში „პრინციპული შეუთავსებლობა“ აქვს არა მარტო მაია მიმინოშვილთან, არამედ ცენტრის თანამშრომლებთანაც“.

მისივე თქმით, შაშკინმა მათთან შეხვედრისას არსებითად მხოლოდ ის განაცხადა, რომ თანამშრომელთა გათავისუფლება მინისტრის უფლებამოსილებაა და „ეს გადაწყვეტილება არ საჭიროებს არგუმენტირებას“.

ცენტრის აწ უკვე ყოფილ თანამშრომლებს მიაჩნიათ, რომ „მინისტრის გადაწყვეტილება უპასუხისმგებლო და საზოგადოების დაკვეთასთან მკვეთრად შეუთავსებელია“.

internet.ge