14 ივნისს, საქართველოში შეზღუდული შესაძლებლობების მქონე პირთა დაცვის დღე აღინიშნება. აღნიშნულ დღესთან დაკავშირებით, შეზღუდული შესაძლებლობების მქონე პირთა სპორტის ფედერაცია და მოძრაობა „ხელმისაწვდომი გარემო“ ყველასთვის აწყობს პარა-კალათბურთის საჩვენებელ მატჩს.

შეხვედრაში მონაწილეობას მიიღებენ შეზღუდული შესაძლებლობების მქონე პირები და საზოგადოებისთვის ცნობადი სახეები.

ორგანიზატორთა განცხადებით, აღნიშნულ პროექტს ძალიან დიდი მნიშვნელობა აქვს შეზღუდული შესაძლებლობების მქონე პირთა საზოგადოებაში ინტეგრაციისათვის. მათი თქმით: „თითოეულ ჩვენგანს დიდი წვლილის შეტანა შეუძლია შეზღუდული შესაძლებლობების მქონე პირების სოციალურ ინტეგრაციაში“.

შეხვედრა 14 ივნისს, 12:00 საათზე, სპორტის სასახლეში გაიმართება. დასწრება თავისუფალია.

Internet.ge