თბილისის მერიამ საბაგიროების ინფრასტრუქტურის მოწყობა დაიწყო. ქალაქის საზოგადოებრივ ტრანსპორტს დღეიდან რიყის პარკისა და ნარიყალას ციხე-სიმაგრის ერთმანეთთან დამაკავშირებელი საბაგირო შეემატა, რომელიც აღნიშნულ ტერიტორიებს  ერთმანეთთან  უმოკლეს დროში აკავშირებს. 

საბაგირო საერთაშორისო სტანდარტების მიხედვით აშენდა, ის სრულიად უსაფრთხოა და  მგზავრებს ორივე მიმართულებით უწყვეტ რეჟიმში ემსახურება. რიყის საბაგირო ხაზის სიგრძე 500 მეტრია და ის 7 გონდოლას მოიცავს. თითოეული მათგანი შემინულია, ხოლო ერთ-ერთი სრულიად გამჭირვალეა, რაც მას ორიგინალობას მატებს. საბაგირო ადაპტირებულია შეზღუდული შესაძლებლობების მქონე პირებზე. 

საბაგიროთი მგზავრობისას სტუდენტები, მასწავლებლები, პენსიონერები და სოციალურად დაუცველი პირები ნახევარ ფასად იმგზავრებენ, ხოლო სკოლის მოსწავლეები და ტერიტორიული მთლიანობისთვის  მებრძოლი ვეტერანები უფასოდ. საბაგიროს გონდოლებიდან ძველი თბილისის ისტორიული ნაწილის - კალასა და აბანოთუბნის შთამბეჭდავი ხედები იშლება, რაც მიმზიდველია, როგორც ადგილობრივი მოსახლეობისთვის ისე ტურისტებისთვის. საბაგირო საზაფხულო რეჟიმით დღის 12 საათიდან ღამის 12 საათამდე იმუშავებს.

იხ. ფოტორეპორტაჟი

internet.ge