საქართველოს განათლებისა და მეცნიერების მინისტრმა დიმიტრი შაშკინმა და ქვემო ქართლის გუბერნატორმა დავით კირკიტაძემ დღეს, რუსთავის №24 საჯარო სკოლაში „მომავლის კლასი“ გახსნეს. 

"მომავლის კლასებში" ინტერაქტიული „ჭკვიანი დაფა” და სენსორული  მონიტორებია დამონტაჟებული. მასწავლებლებს საშუალება ეძლევათ  ინტეგრირებული გაკვეთილები ჩაატარონ, ხოლო სპეციალური მონიტორები სასწავლო პროცესში მოსწავლეების მაქსიმალურ ჩართულობას უზრუნველყოფს. მონიტორის საშუალებით  მასწავლებელს საშუალება აქვს თვალყური ადევნოს მოსწავლეების მუშაობას, საჭიროების შემთხვევაში დახმარება გაუწიოს,  გაუგზავნოს კომენტარი და მისცეს რჩევები.

სამინისტროს ინფორმაციით,  ახალი სასწავლო წლიდან „მომავლის კლასები“ გარდაბნის №1,  თეთრიწყაროს №1, მარნეულის №6,  დმანისის №1, წალკის №2,  ბოლონისის №1 საჯარო სკოლებში ამოქმედდება.

„ახალი სასწავლო წლიდან საქართველოს საჯარო სკოლებში 100 ”მომავლის კლასი” გაიხსნება.  ამ ეტაპზე ”მომავლის კლასების” რემონტი და მათი სათანადო ტექნიკით აღჭურვა მიმდინარეობს. სამინისტროს საგანმანათლებლო და სამეცნიერო ინფრასტრუქტურის განვითარების სააგენტოს მიერ ამ ეტაპზე ქვემო ქართლში უკვე კეთილმოწყობილი და გახსნისთვის მზადაა 20 ახალი ”მომავლის კლასი”. მრავალფუნქციურ საკლასო ოთახში შესაძლებელია ჩატარდეს: ინგლისურის, ქართულის, ქიმიის, ბიოლოგიის, ფიზიკის, გეოგრაფიის, გეომეტრიის  გაკვეთილები;

სხვადასხვა საგნის სწავლებისას გამოყენებული იქნას ვირტუალური ლაბორატორიები“,- აცხადებენ სამინისტროში.

internet.ge