“ქრისტიან-დემოკრატი“ ჯაბა სამუშია დედაქალაქის ბიუჯეტში შესატან ცვლილებებს აპროტესტებს და ქალაქის მთავარ ფინანსურ დოკუმენტს "ნაციონალური მოძრაობის" პარტიულ ბიუჯეტს უწოდებს.

როგორც საკრებულოს თავმჯდომარის მოადგილემ დღეს, გამართულ ბრიფინგზე განაცხადა, წინასაარჩევნო კამპანიის წინ,"ნაციონალურ მოძრაობას" ბიუჯეტში თავის სასარგებლოდ შეაქვს ცვლილებები.

“გამომდინარე იქიდან, რომ ჩვენ წინასაარჩევნო კამპანიის რეჟიმში ვართ, ბიუჯეტში სწორედ ის ცვლილებები შედის, რომელიც "ნაციონალური მოძრაობის" მაჟორიტარ კანდიდატებს სჭირდებათ. დედაქალაქის ბიუჯეტში შესატანი ცვლილებების მიხედვით, სოციალური დაცვისა და ჯანდაცვის პროგრამებს - 2 მილიონი ლარი, პროექტ "ძველი თბილისის ახალ სიცოცხლეს" – 19 მილიონ 300 ათასი ლარი, ავარიული სახლების რეაბილიტაციას კი 5 მილიონი ლარი მოაკლდება, თუმცა თანხები ემატება  სპორტულ ღონისძიებებს, კულტურულ პროგრამებს, შიდა ეზოებისა და ჩიხების ასფალტის საფარით მოპირკეთებას და ასევე სკვერების გამწვანებას, რაც ცალსახად მეტყველებს იმაზე, რომ დედაქალაქის ბიუჯეტი ნაციონალური მოძრაობის პარტიულ ბიუჯეტად იქცევა”,- განაცხადა ჯაბა სამუშიამ.

ამასთან, საკრებულოს თავმჯდომარის მოადგილემ განაცხადა, რომ 2011 წლის ბიუჯეტში შესაკეთებელი გზების ჩამონათვალში დასახელებული იყო ის ქუჩები, რომლებიც 2012 წლის ბიუჯეტშიც ზის. როგორც ჯაბა სამუშიამ აღნიშნა, ფრაქციის "ქრისტიან -დემოკარატები” წევრები აღნიშნულ ცვლილებას მხარს არ დაუჭერენ.

Internet.ge